熱門:

2017年10月9日

方卓如 方如玉帥

好難找尋資產儲存財富

曹星如可能自己都以為會輸,點知最後變贏。如果河野公平冇用頭撞到曹星如開唔到眼,打到尾邊個會贏?如果曹星如額頭唔係腫到成隻雞蛋咁,左眼痛到撕心裂肺,會唔會打得更有勁,唔會愈嚟愈似捱打?如果唔係第七回合終止比賽,而係第十回合,會唔會由河野公平點數勝出?

世界上冇咁多如果,只有結果。結果就係保持連勝,但係仲令支持者頭痕。萬一唔同河野公平重賽,下一場自然要挑戰日本世界冠軍井上尚彌。但係井上用6個回合就有能力打低河野,而且仲比曹星如細6年,八成比賽都係打到對手瞓低。曹星如本來就係要用同河野一戰嚟測試自己挑戰井上嘅能力,而家未達測試目的,又畀自己點數贏咗,仲係保持全勝紀錄,下一步點算?急流勇退收山?唔理年紀增長再用一場比賽測試實力?直接挑戰井上,唔打就唔會輸,打就一定要贏?相信消緊腫嘅曹星如而家諗到頭都大埋。

全球資產價格泡沫同曹星如腫咗嘅額頭一樣,愈嚟愈大。《經濟學人》都覺得唔對路,封面專題報道。但同好多專題故仔一樣,《經人》都係冇答案,只係講啲阿媽係女人嘅建議,例如中央銀行應該避免泡沫漲得再勁爆得更轟烈。問題係而家全球資產價格上升,已經唔係因為低息或量寬。美國開始了加息周期,但係股市照升;香港加息已經行動之中,發展商提供的呼吸按揭計劃,利息支出比銀行按揭高出甚多,但係無阻入市意欲,樓盤推幾多買幾多。買股票可以係非理性,例如高追眾安(06060)毫無基本因素可言,純粹寄望有下手更高價接貨,或者係理性地認為有非理性嘅下手出現。買樓好難係非理性,因為涉及借一筆還大半世嘅債,借錢係唔會非理性,除非賭博翻身。

資產價格不斷上升,通脹率與失業率同時處於低位,一連串同以往經濟理論唔符合嘅事情,好大程度係因為人類嘅生活模式同以往唔同。網購同freelance工作方式盛行,已經將60年前提出嘅Phillips curve打冧。年輕人生活唔再憂柴憂米,滿足佢哋嘅唔再係物質生活,追求銀紙唔係大部分年輕人嘅目標。

全世界嘅銀紙落入一小撮中年及老年人手上,佢哋無處可使,惟有就係不斷累積資產。反正佢哋都冇幾耐命使錢,回報多少並非主要考慮,反正就係要搵方法儲存財富。

與其話年輕人靠父幹買樓,倒不如話老竇老母利用個仔嘅首置quota,幫自己買多層樓。要記住,將來父幹母幹百年歸老,年輕人自然有層樓接手。而家唔同以前有幾兄弟姊妹要爭家產,年輕人將來有層樓承繼幾乎係必然嘅事,唔一定要而家辛苦供樓。有子女靠父幹買樓,更多嘅其實係父幹靠子女幫自己買樓,要個仔供。究竟邊個搵邊個着數?講唔清。新一代好難累積財富,上一代好難找尋資產儲存財富,就係當今世界嘅寫照。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads