2017年10月6日
恒生指數逼近大時代高位,但係成交就少大時代一半,證明今次升市只限於少數大價股份,同埋大部分普通市民都無份參與今次升市。眾安(06060)上市後先跌兩日,再怒升兩成破高位,表示大戶要等抽中股票的散戶走得七七八八,先開始發力買上。以前散戶賴以發達嘅方法係買中隻倍升嘅股仔,一鋪過贏返以前輸嘅銀両。
而家嘅世界,股仔猶如過街老鼠喊打喊殺,賣殼轉型又諸多限制,想靠股票發達,就要買中可以倍升嘅大股,例如吉利(00175)、恒大(03333)、瑞聲(02018)、舜宇(02382)。講風險同回報,其實買呢啲大股仲好過買股仔,因為你夠膽落重注,唔怕停牌,唔會暴跌九成,而且流通量足夠,幾時賺夠想走都得。明顯地香港係想市場集中買一百隻大價股,好過市場上充斥一千隻細價股。大價股同細價股嘅監管成本一樣,但係大價股就算俾沽空機構追擊完,股價仲識創新高。俾着你係監管機構,你都想趕走晒啲不務正業嘅細價股,讓路俾啲做生意嘅大價股。今次慢牛升市,投資者要學懂大價股一樣可以有炒賣嘅能力,不讓細價股專美。
電視廣播(00511)提出司法覆核勝訴,即是外資無論手持幾多股票,始終唔會有過半投票權。引申為如果獨立股東投票,就算外資一致反對,永遠都唔可能過半,哪怕反對嘅有幾多股。電視廣播嘅大股東自己有同股不同權機制,令某人可以手持較少股票反而有較大影響力。到獨立股東投票時,外資股東無論手持幾多股票,都唔會構成過半數嘅結果。《廣播條例》本來係確保傳媒唔會落入非港人嘅手上控制,但電視廣播用財技變相由非本土港人控制之餘,外資連《證券條例》容許嘅小股東就股票利益嘅否決權都冇埋,可見同股不同權嘅威力,唔只永遠得唔到控制權,連保護自己嘅股票利益都不能。咁嘅情況下,同股不同權嘅股票,比老千股更加老千,至少老千股可以鬥多股票嚟反擊,同股不同權嘅股票,你用錢買幾多股票都要輸。
訂戶登入
下一篇: | 高沽空就想入市? 因果關係你要知 |
上一篇: | 大王都冇面畀 |