熱門:

2017年10月4日

麥狄文 金融街密語

兄弟只可共患難 不能共富貴

放完一個長周末,仲要加埋黃金周假期,以為魚缸內都唔會有乜特別消息,點知上周五原來有家創仔公司搞到上差館,今日又大把花生剝。故事主角涉及一家賣Bra的寶號,周二開市即逆市急插,見過上市新低後玩停賽,停牌前報0.255元,比起上周五收市價,跌咗12%。公司停牌暫未有原因,不過缸邊友估計跟上周五公司開董事會期間,有人發生衝突,先係口角,繼而動武,最後更驚動警方。阿Man本以為公司今日開市前會申請停牌,誰知開開吓市忽然拉閘。

睇番報道,話公司上周五舉行董事會期間,有人質疑某高層挪用公款,當事人當然否認有關指控,更表示有人抹黑。有八卦公向阿Man報料,周五董事會大把花生剝,皆因未見過開董事會,竟然有人叫埋母親同外母,仲要搵十幾廿個彪形大漢陪伴出席。

原來當日開會,係另一位高層J君,指控有人用公司支票買一艘幾百萬元嘅二手遊艇,唔單止未經董事會同意,仲有可能買貴咗嘢,質疑有人挪用公款。不過,會上多名董事表示對於公司資金運用,一直知情,並認為事件並無不妥,亦未有存在公器私用嘅情況。J君見提出疑點後,卻未有得到其他董事認同附和,深深不忿,聯同喺會議室外等候嘅多名彪形大漢大聲叫囂,期間更有人喊打喊殺,混亂之中有人受傷,搞到要打三條九。

小股東當災

其實講番提出公司資金被挪用嘅J君,其財務狀況也不見得白璧無瑕,較早前被一間財仔入稟高院追數400萬元,除咗呢條街數,據聞亦欠公司幾球。其實公司點運用資金,又豈能一人獨決,隻手遮天,今次董事會大部分董事都表示知情,亦同意。今次呢件事,有人懷疑J君純粹係借題發揮,似乎係惡人先告狀。至於公司有冇人涉嫌詐騙,要留番警方去調查,阿Man同其他花生友,都係繼續剝花生,誰是誰非,實難喺現階段妄下判斷。

不過,今次呢件事,又令到阿Man諗番起,之前有單八卦料,係講有間公司兩公婆因為股權持平,搞上市期間因為各懷鬼胎,結果最終上市計劃拉倒,兩公婆離婚收場。今次就係兄弟反目,原本一對情同手足嘅好友,只能共患難,不能共富貴。公司當初由呢兩位高層兼難兄難弟一手一腳建立,到今年一波三折後終能上市,人生踏入另一個里程。可惜,偏偏有人自己理財不善,搞到拖欠街數同公司數,家陣仲要搞出個大頭佛,又係一個為錢反目嘅故事。

呢單嘢管理層邊個着,邊個唔着,公說公有理,婆說婆有理,但睇嚟都有排搞,公司仲要惹埋官非,今次都咪話唔濕滯,講嚟講去最慘都係小股東,無論黑狗定白狗偷食,最終都係小股東當災。

麥狄文(徐狄怡.證監會持牌人)

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads