熱門:

2017年10月4日

郝承林 價值物語

與大師賞月

小時不識月,呼作白玉盤,又疑瑤台鏡,飛在青雲端。國慶假期,親友相聚,酒過三巡,迷迷糊糊便睡着了。

一覺醒來,竟然是和本報前賢曹仁超一起喝花雕吃大閘蟹。

難得見到曹公,當然要請教心中疑難,港股今年升了這麼多,後市該怎麼看?

「你問我,我問邊個?但恒生指數去年尾22000點起步,到現在已上升近三成,幅度較大,調整好正常。今天新興市場股市表現係咪同1999年嘅科網股相若?我老曹木宰羊。」

「咁即係應該割禾青,快快清貨離場?」

而家入市 小心賺糖輸廠

曹Sir吃一口東坡肉,緩緩地道:「除了上帝,沒有人可以事前知道頂部喺邊,但無相干,最緊要記住止蝕唔止賺!任何時刻損失10%,便須認真考慮止蝕。一旦損失擴大至15%,便不理任何理由都要止蝕。相反,賺錢則可以不理。個市升咗咁多,你咪當放風箏囉。Cut loss, let profit run!股份調整15%便止賺,否則便話之佢。升市莫估頂。但而家先入市,小心賺粒糖,輸間廠。」

我看着煙熏黃魚上桌,問:「自去年末看淡香港樓市,港樓連續升足8個月,本欄招牌也快保不住了,怎麼辦呀曹Sir。」曹先生夾了塊「面珠凳」給我,然後喝一口花雕,大喝一聲:「上帝要你滅亡,必先令你瘋狂!牛市在愁雲慘霧中誕生,但又永遠在歡樂聲中死亡!我老曹喺趨勢嘅信徒。金融海嘯後,美國印銀紙來解決危機,結果推動全球資產狂潮。趨勢形成時加入,就好似911後美國減息刺激通脹,我老曹便決定『每月一金幣』,初初畀人笑『每月一弊』,到最後又係點?散戶永遠慢幾拍。

「過去十年無買樓嘅人,而家最心思思想買樓。但永遠要記住喺趨勢完結前退出!每次做決定前,將買賣原因寫下來。至於而家有冇買樓理由,趨勢係乜嘢,你自己分析。趨勢先係你最好朋友(講緊『縮表』?),唔係走勢(講緊樓市近月創新高?)。有智慧不如趁勢!」

與其辨牛熊 不如啱方向

已經吃到酒釀丸子,但話匣子打開了,曹Sir便愈講愈興奮,「1967年至2017年本港樓價由50元一呎升到15000元一呎,恒生指數由1967年64點升到2017年10月28000點,根本冇理由唔發達(已經插唔到嘴……)。30歲前一般人靠打工賺錢,30歲以後應學習錢搵錢;更叻嘅人40歲以後搵人同你搵錢。財富唔係賺(earn)番嚟,而係製造(make)出來。閣下有冇智慧捕捉到下一個大趨勢?請不要work for money, let money works for you!(心想已聽過最少一百遍、一千遍!)

「今時今日投資市場已唔再理會乜嘢牛熊市,只在乎你係咪响每次趨勢改變時皆企响正確方向。買賣股票須『隨波逐流』、跟紅頂白(未來5至10年,最有條件的肯定是科網)!將相本無種,男兒/女兒當自強(講咁多次的人都會日日睇的秘密在哪)!

「年紀大了,必須珍惜三老:老本、老伴和老友。有老本可吃、有老伴常在、有老朋友交往。中秋佳節,是人月兩團圓的日子,唔好淨係掛住搵錢,要記得關心你身邊的人(原來便是因為一份真)。」

叫了這麼多菜,吃得光嗎?還請了李白、蘇東坡, 當然吃得光,只是沒有人聽得明曹Sir的「煲冬瓜」。

宴畢,月夜漫步。曹Sir告訴我,他在天堂如何和John Lennon唱聖詩,和愛因斯坦談複利(Compound Interest)。良久良久,不知東方之既白。

[email protected]

 

(編者按:郝承林最新著作《致富新世代2──科網君臨天下》現已發售)

歡迎訂購:實體書、電子書

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads