2017年9月14日
Apple嘅產品發布會,識睇梗係連同股價圖一齊睇。唔講你唔知,成程介紹會一直進行中,股價好哋哋一直上升,但係一到介紹iPhone X之時,股價隨即掉頭向下,全日倒跌收場。奇就奇在,iPhone X一定大賣,求過於供,賣到出iPhone XI都仲有人等緊,而咁好賣嘅產品都支持唔到股價?莫非投資者見到啲平常人見唔到嘅利淡訊息?
唔使亂諗,你睇番歷史,大多數時間新iPhone公布後3日,股價都係下跌。但結果係點?結果係任何一部新iPhone推出嘅時候你買Apple股票都贏,所以你唔好誤會iPhone X是否有問題,市場唔接受。疊埋心水諗計去買呢部你有錢都買唔到嘅iPhone。
諗番起10年前Steve Jobs第一次介紹iPhone,佢只係視iPhone為集打電話、聽歌、上網功能嘅新工具,全因為全世界手機數量咁多,iPhone只要佔市場百分之一都已經唔得掂,有信心做電話係有贏冇輸,況且Steve Jobs認為iPhone係劃時代,重新發明了電話,淨係可以聽歌嘅電話已經肯定賣到錢。而佢台上示範一啲而家視之為基本嘅新功能,全場嘩嘩聲,佢自己都未知iPhone唔單止改變了Apple嘅命運,令公司成為全世界市值最高嘅公司,仲直接改變了世界,製造了唔少新行業,帶挈了一批新富豪。
Steve Jobs係我由細睇到佢大,由Apple II開始,親眼目睹佢嘅起跌。佢唔知iPhone原來有咁大威力,只係由一部新電話開始,就改變了世界。做人同做生意一樣,冇乜嘢生涯規劃,唔可以由頭計劃到尾。
而家創業嘅年輕人,唔使睇得咁長遠,見步行步,你或者都可以改變世界。
訂戶登入
下一篇: | 市況膠着 強勢股㷫恰恰 |
上一篇: | 「滬港通」及「深港通」上日收市統計 |