熱門:

2017年9月13日

方卓如 方如玉帥

腦筋要快手腳要更快

恒生指數收報27972點,升17點,成交899億。8月底升穿28000點之後,大市已經打橫行咗兩個星期,而家輪到本地地產股乘住首置上車盤嘅好消息炒上。過埋9月,第三季嘅業績如果繼續理想,股市有機會升到年尾,到時就真係成地眼鏡碎,說好的逢七必災而家已經冇人再講。

世界轉得太快,要動腦筋賺錢行動都要快,否則好快就會被人攔截。ICO在大陸被禁,香港都話要密切留意,有機會構成證券。好多人連ICO都未知係乜嘢就已經冇得參與,證明要呃人,手腳都要快。全靠Bitcoin帶挈,以Blockchain為基礎嘅電子貨幣有人信,信佢嘅價值一定愈炒愈高。

政府幾十對眼𥄫實你

如果你有本事創造一個新嘅電子貨幣,有人肯預先畀錢先買為快。等於發展商起樓先賣樓花,你製造貨幣之前先賣貨幣。既然發展商賣樓花集資起樓唔算係出售證券,電子貨幣製造商先賣貨幣都唔應該係證券。呢種介乎眾籌同賣樓花嘅手法,你未諗到點樣搵食之前,政府已經幾十對眼𥄫實你。腦筋要快,手腳要更快,搵錢慢一步都唔輪到你。

地產同股票經常交叉感染,地產賺到錢嘅會轉型炒股票,炒股票賺到錢嘅又會走去做地產。究竟邊樣賺錢更多?林特都話地產唔係普通商品,政府有無數嘅招數要令炒地產冇錢賺,只係放生有實力嘅發展商。有錢有地嘅發展商,喺香港呢個環境係唔會蝕錢。

即係話,你想從股票轉型做地產,先決條件係贏到夠晒本走去買地起樓,只係夠錢買幾間舖就不如唔好搞。地產商走去炒股票,以雄厚實力殺入股市,要炒起一兩間上市公司易如反掌,但係賣貨同賣樓係完全唔同。香港地賣樓係毫無難度,只要價錢開得好,瞇埋眼都賣得晒。股票唔係,要賣股票難度好高,未贏錢之前先要輸好多錢。

講到尾,地產又叻股票又叻嘅人,想窮都難。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads