熱門:

2017年9月1日

畢老林 投資者日記

聽完要去做

8月31日,周四。有一次牧師在聚會中突然埋怨:「我相信如果問各位上星期我講過乜,估計你哋多數唔會記得。我知道有人在禮拜時非常有心機做筆記,但返到屋企就順手把筆記和《聖經》放落櫃桶底,然後所有聽過嘅嘢好似粉筆字一樣抹晒。」

牧師再加一句:「其實就算你熟讀《聖經》,將上帝嘅說話背晒,但得過講字,一樣冇用。知幾多,做幾多,付諸實行,咁至有意思。」從牧師一席話,聯想到香港投資文化,其實差不多,有多少人會認真吸收大師作品的精髓?即使聽得進耳,又有多少人會貫徹實行?

永遠做塘邊鶴,自然沒可能發生任何事。夠膽下注,算踏出第一步,但要炒得叻,必須首先建立一個有效的trading system。打電話問冧把,然後去馬,不算是一個好的「操盤系統」。刨財經,照建議10元買入,9元止蝕,11元止賺,亦不是好的方案。

讀雞精也好

不願意花時間細閱原著,起碼讀讀雞精。例如隨便上網查查,便能汲取到一代trader天王Jesse Livermore的投資智慧。逐一對對,你能夠純熟掌握哪幾樣?

天王心法,精髓中之精髓,乃任何投資睇法都必須先得到市場證明,才有出手價值。現實中,十個有九個心裏先存偏見,然後決定睇好睇淡,繼而做出相應買賣動作。

當市場反應出乎意料,仍然拚命找理由,指摘Mr. Market如何不可理喻,卻忽略市場先生有其獨特思路,或者焦點已經轉移到其他因素。

天涯何處無芳草

天王建議大家得出初步分析結果後,一定要等到股價變動出現明顯訊號,支持想法正確,才算時機成熟。

太早出手,遇上股價往相反方向走,睇啱亦難有信心堅持,結果照樣失敗收場。的確,影響股價因素太多,而且隨時出現新的狀況,市場邏輯又經常改變,表面上合理,往往未必發生;你從未想過的,卻偏偏出現。堅持自己思路,無視市場,好危險。

天王又呼籲大家忍忍手,切忌樣樣都想參與,鋪鋪都想落注,因為個人精力有限。沒有明顯機會,毋須急於入市。喜歡日日泡金魚缸,各處打聽消息的人,常常容易手痕,見到稍具吸引的標題,例如某大行認為現價超值,又或媒體唱好某個主題,就會飛身撲入。

天王又勸大家留住好盤,讓利潤繼續滾大,剪除壞盤,控制損失。然而,更多人恐怕倒轉來做,賺粒糖就急急腳閃,輸錢就磨爛席,賴死唔走。天王特別告誡世人莫要溝淡,溝淡等於加大自己的麻煩與壓力。天涯何處無芳草,有錢不如用在其他更有把握的交易。可是,對醜股不離不棄,一心力挽狂瀾、反敗為勝的人,似乎佔多數。

Livermore在其大作How to Trade in Stocks 第一章,就提到不喜歡動腦筋,一心想搵快錢的人,進入市場會輸得很慘。

正如天王的比喻,讀本關於如何keep fit的書,但只想望着別人做運動,根本無可能達成瘦身願望。投資也好投機也好,應該看成一個專業。一般人不會問一個醫生如何搵快錢,為何投資會例外?所以明燈有,但只能指出一條路,怎樣行下去,必須靠自己。Livermore苦苦參悟40年,經歷無數成敗才寫成的心法,點會冇參考價值?

化為己用

假使覺得Livermore的風格與你唔多啱key,還有大批高手,包括畢非德、彼得林治、鄧普頓、博格爾(John Bogle)等,各有特色,各擅勝場,總有一位適合你。

關鍵都係嗰句,任何好辦法,只有聽完去做,放在自己選擇的市場反覆測試,方能化為己用。

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads