2017年8月31日
當Amazon收購Whole Foods,而另一邊廂Walmart收購Jet.com,美國最新嘅分析,係中產已死。點解收購又關中產事?因為Amazon由服侍高端客戶投向草根階層生意,而做開草根嘅Walmart又想打使得起錢嘅人主意,中產日常幫襯開嘅商場,就陸續執笠。
所以Amazon收購,表示嘅唔係眼見嘅網上線下結合,而係一個血淋淋嘅社會現象。
關於中產日漸滅亡,網上有大量數據,包括年輕人賺唔到父母同等年齡時嘅收入,消費開始局限於日常必需品,生活質素十幾年來冇寸進。問題係數據主要係來自歐美,香港沒有特別研究中產待遇,只有計算住屋面積愈住愈細。可能正因如此,中產危機意識不足,例如夠膽用發展商高成數一按買樓,可以想像生活質素除了住屋面積以外,往後20年只會拾級下降。
用發展商高成數一按,最樂觀預算,是3年後能夠在銀行上會,享受番較低利息。但係大前提是,3年後人工要較現在為高。如果人工沒有增加,是沒法通過壓力測試,亦冇可能補回按揭成數差額。但係預期人工必定上升,我相信一年比一年艱難。政府工都係合約制,今日有,將來可能會冇,連最穩陣嘅工都唔穩陣,職位安全當今世界係唔存在。
中產滅亡 環球現象
最好搵嘅金融工作,我肯定5年之後香港人嘅機會至少減半。專業人士除了醫生同大律師,其他全部可以有輸入代替品,而專業人士嘅貧富懸殊同社會現況不相伯仲,最搵到錢嘅專業人士同僅僅可以餬口嘅專業人士,位處兩極。中產之中最好搵嘅行業未來都冇運行,咁買樓嘅中產又點可以預期3年後可以搵得比現在多?
但係人始終要有瓦遮頭,每個月交租亦唔見得好舒服,買咗層樓,仲可以博升值,他朝走投無路,都有層樓救急。中產面對嘅問題,買樓又死,唔買又死,如果開價稍平,借得又盡,博一博,至少有個機會。
美國都要面對中產滅亡,香港冇理由可以幸免。 同美國一樣,而家做生意,只可以向有錢人同窮人埋手。
訂戶登入
下一篇: | 越通5.6元以下可加碼吸納 |
上一篇: | 「滬港通」及「深港通」上日收市統計 |