2017年8月11日
8月10日,周四。這兩天最「熱鬧」的新聞,自然是特朗普與金正恩隔空「開火」鬥拋浪頭,唔信都要嚇到你信。道指隔晚跌逾70點,恒指兩日累挫410點,周四收報27444點。
道指周二早段個勢仲幾靚,以為可以連續11個交易日創歷史新高,惟下半場單日轉向,同日債金滙等市場異象卻不明顯,燶味係有,但唔多似risk-off。
《華盛頓郵報》指美國情報發現北韓可能已掌握在洲際彈道導彈安裝小型核彈頭的技術,特朗普一見火起,揚言北韓若不自量力威脅美國,誓要「怒火焚朝」。金正恩不甘示弱,以計劃攻擊關島美軍基地回應。
如此這般,明明唔想risk-off的市場,給這老少「狂人」一人一句愈講愈激,避險情緒終於升溫,黃金、美債、日圓、瑞郎,「恐慌指數」VIX同步上升。
怒火焚朝?
朝鮮半島局勢惡化,南韓股市往往首當其衝,但有一類股份例外,就是生產電子軍用器材的公司。屬於這個板塊的Victek,周三股價一度狂飆兩成,翌日雖略為回順,惟其對手Speco則連升兩天,繼周三漲13%後,翌日再升半成。
這類股份在戰雲密布時的升勢確實好誇張,攞嚟做新聞很搶眼,但當作朝鮮半島或地緣政局指標就得啖笑,升咗先追入仲大鑊,坐艇易過發達。睇番Victek幅圖,今年4月曾升穿6000韓圜,其時國家主席習近平訪美,北韓於中美峰會期間試射導彈,明剃兩巨頭眼眉。特朗普當時就說過要肥仔金「乖啲」,否則勿怪山姆大叔唔客氣,大有美國不惜單方面向平壤動武之勢,Victek股價就係咁樣抽咗上去。
益晒對家
中美峰會後,特朗普寄望中國加強向北韓施壓,美國向平壤採取軍事行動的憂慮紓緩,Victek股價即無以為繼,賺埋唔夠輸。數月下來,特朗普對中國「辦事不力」愈來愈不滿,本周失驚無神發推文轟肥仔金,Victek股價又喪升。
次次係咁,攞佢嚟做朝鮮半島局勢指標,睇新聞就得,何必多此一舉?掉轉來做,拿它當「燈」,勝算反而更高。這個情境有點像VIX,冇事冇幹買puts好似掟錢入鹹水海,對沖都嫌費事。等到VIX抽升, 個市已經跌咗落嚟,人人高位買puts保護長倉時,個市可能已經跌完,益晒對家。
北韓局勢會怎樣發展下去,老畢當然唔知,但近期港美股市升勢欲罷不能,食糊唔捨得,繼續坐又驚個市冇乜水位再去。反正都係等調整,有什麼藉口好得過地緣危機一觸即發?
相對硬淨
值得一提的是,美國幾隻科網龍頭繼續腳軟,反而商品資源板塊相對硬淨,如果美股借北韓局勢來一次像樣的調整,資源類股份更加撈得過。
放大圖片 / 顯示原圖 放大圖片 / 顯示原圖
訂戶登入
下一篇: | 鋼鐵虛高 酒醉一回 |
上一篇: | 香港股市上日收市統計 |