熱門:

2017年8月2日

畢老林 投資者日記

風險歸風險 回報歸回報

8月1日,周二。在電梯間碰上Patrick,同事三分親,打過招呼後少不免吹兩嘴。老畢八卦問Patrick:「港股近期氣勢如虹,你老哥執唔少啦?」時間倉促,長篇大論冇可能,但見對方牙痛咁聲,只應了一句:「哎,走咗騰訊(00700),分兩次出貨,醒嘞啩,咪一樣揼心口?」辦公室層數不同,聽Patrick呻完一輪,𨋢已到門口。

股票嘅嘢,買從來唔難,沽才是挑戰。不論止蝕止賺,出貨後的股價變動,往往令投資者哎吔連聲。聽Patrick口氣,蝕一定冇佢份,分兩次走仲要嘆氣,十居其九嫌賺得少而已。

沽咗呻唔番

香港這邊有騰訊,美國那邊則有五隻手指數得晒的科網龍頭。媒體不斷提醒大家,美股所以屢創新高,全賴FAANG/FAAMG(視乎閣下喜歡把Netflix還是微軟放進字母組合)帶動。然而,年初以來,數大龍頭累積升幅少則兩成、多則五成,以其哥斯拉一般的噸位,許多人都覺見好應收。賬面大嘗甜頭之輩減磅或索性食糊,正常兼合理。

問題是,百五美元沽Facebook,出咗貨話咁快飆上百七,科網巨頭次次回軟,市場氣氛都好似殺到埋嚟,結果像Patrick一樣沽咗呻唔番的例子,在華爾街俯拾皆是。

大家切勿誤會,老畢無意教人有食唔食。賺幾多至夠,你清楚過我,用不着在下亂畀意見。我只係想講,風險與回報關係從來都不是絕對的,風雨同路堅持到底正確,抑或接受眼前事實,長痛不如短痛明智,並非一句N年前投資一萬蚊,N年後變幾多十萬可以講得清。

當「故仔」聽,貝索斯(Jeff Bezos)、朱克伯格(Mark Zuckerberg)都是如假包換的商業奇才,亞馬遜及Facebook有今天成就,唔到你唔服兼講番句抵人發達。可是,作為這兩家公司的股東,條數又點計?

就以Facebook為例,2012年招股上市,以IPO價38美元計,現價約170美元,上市5年回報3.5倍;若以掛牌三個月後低位18美元計,回報更達8.5倍。單看上述數字,誰不渴望5年前買入Facebook長揸?然而,關鍵並非賺三倍半還是八倍半,而係Facebook上市頭三個月從38美元瀉至18美元,名副其實「腰斬」,你敢不敢在那個時候拍心口話跟朱克伯格風雨同路?

喊到收唔到聲

老畢同意,承受得起股價波動和賬面虧損的投資者,在Facebook的例子中成為大贏家。以這個角度看,押注朱克伯格王國,確是no pain, no gain。可是,願意承擔風險不等於一定能笑到最後。細嗰啲講都嫌費事,Twitter係人都識,與Facebook同屬社交媒體,特朗普更加當佢係寶,攞嚟當辦最啱。然則,做Twitter股東又是怎麼回事?莫說笑到最後,唔喊到收唔到聲已算定力好。

與Facebook先苦後甜相反,Twitter先甜後苦。2013年底招股,「出閘」當天即漲逾七成,上市頭個半月更一度較IPO價高1.7倍。如果你買嘅係Twitter唔係Facebook,開心不夠兩個月,噩夢便接踵而來。此股上市三年多,單日下跌一成或以上合共13次,單日挫5%或以上更多達60次。與招股價比較,Twitter「插水」36%,而跟2014年初高位相比更瀉近八成!

這幾年揸住Twitter股票,除咗周不時chok到暈船浪外,承擔風險換來的不是豐厚回報,而是10蚊唔見8蚊。

有些例子仲谷氣,好似開創fast casual食肆潮流的Chipotle Mexican Grill,全盛時期生意多到做唔切,分店開完一家又一家,股價爆升不在話下。然而,近兩年黑開有條路,食物中毒賴一次嘢唔夠,係都要衰夠兩次。做飲食事業搞到客人上肚下瀉,搵鬼幫襯矣。

睇到咁嘅環境,再一往情深都要跳船。問題是,Chipotle捧場客守了那麼久,認命投降未必甘心,不少人寧可繼續等運到。散戶固然有這種心態,專業投資者如「寸嘴大鱷」阿克曼(Bill Ackman),不亦一次又一次犯了固執這個投資大忌?

傷盡粉絲心

長線確有大茶飯吃,惟投資者必須謹記,風險歸風險,回報歸回報,不能只掛住聽人講亞馬遜、Facebook、騰訊等成功故事,對Twitter、Chipotle等傷盡粉絲心的例子視而不見。

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads