熱門:

2017年7月15日

畢老林 投資者日記

黑過墨斗

7月14日,周五。港股有北水照住,近期氣勢如虹,大行唱嗰隻升嗰隻。相比之下,美股沒有早前那麼搶眼,但回過一輪的科技龍頭,唔覺唔覺又生番晒,特別係隻Facebook,7月開局落筆打三更,失守150美元,惟三扒兩撥已追番上嚟,本周二收市升穿155美元,破了6月23日個頂,執筆一刻見百六,兩個禮拜唔夠幾乎彈足一成,先前驚青低位沽貨又呻走寶。

對有睇冇買的人來說,特朗普當選總統以來,美股感覺上天天創新高,有貨在手想窮都難。真係有trade就唔同講法,買錯板塊沽錯股,豈止睇住人賺咁簡單,簡直傷到入肉。

好使好用

S&P同NASDAQ皆以市值釐訂成分股權重,幾隻大孖沙長升長有,指數就衰唔到去邊。不過,美國上市公司數以千計,行業板塊不細分也有十個八個,揀啱同揀錯,差別就像日與夜,傳統零售股就係一個好使好用嘅例子。

早兩日老畢提及ETF發行商ProShares趁實體店營運商落難,推出短倉策略為主投資產品,以造淡弱勢股吸引散戶。

在下的感覺是:「遲唔遲啲?」所以有此一問,皆因作為一個板塊,美國百貨業黑過墨斗,從高位狂瀉四五成甚至更多的股份比比皆是。從值博率着眼,依家先嚟追沽傳統零售股,分分鐘打落水狗唔成仲要給咬番轉頭,挾死多過嚇死。

話得說回頭,老畢勸人幫襯發行商前要諗過先, 純粹建基於trader直覺,惟零售業慘況有目共睹,百貨公司股東很久已沒好日子過。

預先反映

講開板塊,上半年點衰都衰唔過能源。年初以來,標普能源股指數下跌13%,同大市離行離列唔在講,要搵一個表現差到拍得住能源的板塊都好難。不過,這並非最值得討論的地方。老畢想講嘅係,美股第二季業績公布期序幕剛揭,各板塊中盈利增長最強勁的正是能源。

受油價波動扭曲比較基礎影響,能源企業上季整體盈利按年預期大增4倍。如果老畢於第二季剛開始時拍心口同你講,油企業績其他行業拍馬追唔上,閣下會否認為買入能源股等公布冇衰?真的這樣做,結果離不開一個,就係坐艇。

蚊都瞓矣

油企雖然年初弱到依家,但次季比首季更黑,跑輸所有板塊之餘幾乎每周都跌。

油價對油股雖產生了牽引作用,惟從業績與股價關係着眼,能源板塊今年第二季盈利大翻身,市場其實早在半年至九個月前已預先反映。今年油股大幅轉弱,說明的不過是投資者認為油企盈利復甦已在股價中反映得八八九九,食糊的食糊、減持的減持。現在才講上季業績,慢好多拍矣。

能源股也許有些與眾不同,但市場預先反映業績這一點,任何板塊都適用。季初講季尾已嫌Out,睇埋業績先決定買唔買,蚊都瞓矣!

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads