熱門:

2017年7月4日

方卓如 方如玉帥

最奢侈嘅奢侈品

網上經常有文章訴苦,究竟邊個世代嘅人最慘。林鄭上場,青年人係首要支持對象,要多給他們論政議政參政。一代比一代人上位困難是市場共識,但係一代比一代生活舒適又冇乜人提及。

上位最快嘅梗係六十年代出世嘅人,佢哋大學畢業正值香港人移民高峰,就算你冇料到都可以升職加薪。戇居居買咗層樓而家仲可以印印腳。佢哋未到退休限期,好多仲係坐緊高層位置,真正係擸咗香港最黃金年代嘅所有油水。但係佢哋嘅生活一啲都唔輕鬆,幾肯定佢哋大多數人20歲前未坐過飛機,24歲前都未必屋企自己有間房。30歲結婚開始有自己家庭同事業,又要開始儲錢畀細路讀書。佢哋資產淨值愈嚟愈高,但真正嘆世界嘅日子要50歲後,可以話條命過咗一半都未嘆過,日日都喺度捱。

而家嘅後生仔就唔同,0歲已經有工人姐姐,5歲前已經坐飛機,7歲就懂得唐伯虎成名絕技琴棋書畫,10歲前精通Steve Jobs最大發明智能手機,20歲前分手次數多過佢老豆成世人嘅女朋友。大學畢業前嘅豐衣足食,佢父母要到大學後先可以逐步達到。佢哋老豆50歲仲捱緊,自己就20歲都未開始捱。牌面睇,年輕人生活質素一啲都唔慘,比任何一代都好。

至於向上流動力大不如前,老人家你實在太老喇,唔係個個年輕人都要向上爬。當初你要向上爬,係因你要從冇到有,自然要爬。今日嘅年輕人,從有到更有,追求嘅唔係食日本菜同去旅行,呢啲已經變成生活基本,佢哋要嘅係改變世界。只有香港人咁市儈先會驚訝Facebook創辦人揸普通車娶普通老婆,人哋嘅滿足感嚟自Facebook有20億人用,佢哋改變世界邊係為錢。

知道年輕人為嘅唔係五斗米,咁其實佢哋係相當幸福。佢哋有絕對本錢做自己想做嘅嘢,冇乜家庭負擔,基本兩餐一宿又唔須要擔心。以前創業唔成功最多返去打工,年輕人創業唔成功最多再嚟過,佢哋有多於一次嘅創業機會。現今創業成本係有史以嚟最低,連電腦都唔使,有部手機,坐喺張梳化已經可以創業,佢老豆嗰輩又要租寫字樓又要開電話線。有乜嘢開心過做自己鍾意嘅嘢?呢種最奢侈嘅奢侈品,而家年輕人先可以擁有,年輕人嘅上幾代直情諗都唔敢諗,夠膽去諗嘅,都要付出高昂代價。當然,唔知自己鍾意做乜嘅年輕人,係唔會感覺到呢種奢侈品原來就喺身邊,咁就惟有睇番你老豆點做人,打份工買層樓。人工又唔高,樓價又追唔到,自然生活逼人。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads