熱門:

2017年6月21日

麥狄文 金融街密語

1號牌揸弗人 收入低風險高

阿Man上個月曾撰文講過,家陣受證監會規管嘅發牌人士,6號牌照(就機構融資提供意見)同9號牌照(提供資產管理)嘅負責人員(RO),有價又有市,搞到連律師、會計師都撈過界。不過「同牌唔同命」,同樣身居要職嘅1號牌照(證券交易)RO,可以話相對9仔牌RO,係風險高、低回報嘅一個職位。

點解阿Man會有咁嘅見解,先睇1仔同9仔嘅業務分別先,1仔講緊係證券交易,證券交易包括嘅產品好多,唔單只係股票買賣咁簡單,仲有為客戶股票期權、債券、互惠基金等買賣服務。

即係話一間證券行提供嘅產品愈多,每日所涉交易數量就愈多,錢銀交易出入相對頻繁,一個唔覺意,好容易喺遵守打擊洗錢監管規定時違規犯錯。

相反資產管理只係為客戶提供資產管理或者以全權委託形式管理基金,一般嚟講,只要基金經理遵照成立基金時所訂嘅章程進行交易,基本上好少會有違規情況出現。而客戶幫襯資產管理公司,通常只會喺認購基金或者開全權委託戶口時進行入賬,呢一部分會通過銀行賬戶進行,有銀行先把關。

睇漏眼易踩地雷

至於客戶贖回基金或者取消戶口,亦係透過銀行過戶,甚至客戶資金及資產由保管人(custodian)託管,公司同客戶之間唔會有直接錢銀交易,甚少會被證監叉雞未有遵守打擊洗錢監管規定。

正所謂多做多錯,少做少錯,每日愈多交易,就愈容易有錯處俾證監捉到,有心犯錯當然抵罰,但無心之失有時未必一定關個RO事,但睇漏一眼,略有疏忽,好容易踩中地雷。公司罰錢了事當然係最好, 皆因用錢解決到嘅問題都唔叫問題;但身為RO被問責,分分鐘被罰停賽(暫時吊銷牌照),嚴重者有機會終身停賽,連個牌都冇埋。

近呢一兩年,證監喺遵守打擊洗錢監管規定方面睇得甚緊,尤其係第三方資金轉賬,更加盯得緊,實行大小通吃。即係唔理轉賬數目大小,總之銀行賬戶、入數賬戶跟證券戶口持有人不符,又或者係以現金入賬證券行戶口,一律被視為第三方資金轉賬未有遵守打擊洗錢監管規定。

新鮮滾熱辣一單,就係富途證券CEO鄔必偉被釘牌半年,正正係未有遵守打擊洗錢監管規定被罰。而且呢件事仲要唔係喺富途發生,而係喺2014年1月至7月期間,鄔必偉係當時證星國際期貨(現稱日發期貨)RO兼MD;至於點樣違規,已有相關新聞報道,阿Man唔再喺呢度重複。呢單嘢會唔會影響富途,又唔多擔心,皆因市場上持有1仔RO多的是,口痕友話喺中環一個玻璃窗跌落街都砸死幾個。

有冇咁誇張唔知,但相對9仔RO,1仔RO又真係多好多,皆因以前經營資產管理公司唔多,有經驗嘅業內人士,喺證券行掛牌,大部分都係掛1仔牌。而9仔牌係近10年,尤其近5年先愈開愈多,自然有經驗嘅持牌人唔多,合乎RO資格嘅持牌人當然更少。近呢一兩年,證監批出嘅9仔公司牌照以倍數增長,但明顯具9仔RO資格嘅業內人事數目追唔上公司數目增幅,9仔RO自然矜貴。所謂物以罕為貴,9仔RO嘅人工亦出奇地高,難怪唔少持有1仔RO嘅老行尊都話,1仔同9仔RO嘅人工跟所承受風險唔成正比。

麥狄文(徐狄怡.證監會持牌人)

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads