熱門:

2017年5月25日

麥狄文 金融街密語

「因航」高管犯錯基層受罪

呢個星期最爆嘅上市公司新聞,應該係被高登仔簡稱「因航」的國泰(00293)派大信封呢件事,周一派咗近200個大信封,不過呢個未係總數,嚟緊6月初仲有約400名員工被迫食魷魚,即係呢次裁員總數高達600人。

「豪賭」燃油對沖勁蝕錢

今次「因航」派大信封,又構成另一次「關公災難」,雖然公司已為被裁員工準備咗肥雞餐,遣散條件已算相當唔錯,可惜無人把遣散待遇作為重點留意,反而力數因航大裁員嘅不是。

公司搞到要裁員止血,原因係舊年份成績表見紅蝕近6億元。公司蝕錢想到裁員無可厚非,問題係公司蝕錢,唔係單純被競爭對手圍攻,營業額下跌咁簡單,重點係因為管理層幾年前一個錯誤決策。

國泰管理層喺做燃油對沖時錯估油價走勢,仲要押重注賭得大,做咗高達六成嘅燃油對沖,兼且一次過訂立5年期嘅燃油對冲合約,令公司呢兩年喺燃油對沖上,每年錄得超過80億元對沖虧損,而累計虧損更過百億元。

高管出錯搵基層開刀,係今次裁員最災難嘅地方,重點係大刀闊斧裁員600人,每年僅能節省員工開支3.49億元,僅佔營業開支0.37%。

一條三幾億嘅膠布,又點能夠為過百億咁大個傷口止血。聽聞今次被開刀嘅,唔少係以往為公司賺過大錢嘅老臣子,計一計條數,呢班基層員工每年平均成本約60萬有找,但坐緊大班椅嗰班高管,數埋頂籠兩三打,每年已經要成億員工成本開支。換句話講,只要上面班大帝減薪一半,已經可以炒少80幾個人。

服務每況愈下削競爭力

作為良心企業,除咗要向股東有交代,同時亦要負番啲社會責任,而家講緊600人被炒,呢班人失業,可能會影響咗600個家庭,即係受影響人數講緊過千人。「因航」今次因為高管錯誤決策,拎咗公司錢去「豪賭」,雖未至於當年中信(00267)董事失職違規炒作咁大劑,但「因航」搵基層開刀做替死鬼,點講都唔通。

加上咁樣裁員,令到幸存員工百上加斤,打擊士氣之餘,亦會影響服務質素,惡性循環之下,「因航」嘅服務只會每況愈下,進一步削弱其競爭能力。一塊膠布仔既然止唔到血,不如諗下點樣輸血仲實際。

不過「因航」最近份成績表嘅營業額由1023億元急減至928億元,大嗱嗱唔見成百億元,主要原因唔係生意少咗,而係生意含金量低咗。乘客收益率下跌近一成,因為頭等跟商務客艙需求銳減,令乘客收益率大降,面對行業日益加劇嘅競爭,睇嚟未來收入易跌難升。

其實當年中信炒燶澳元嘅I kill you later(Accumulator),最終止蝕離場埋單都係輸百幾億,但「因航」喺2014年開始搞燃油對沖,合約為期五年,即係要到2018年呢個噩夢先可以完。由2014至2016年間燃油對沖虧損分別達9.11億元、84.74億元及84.56億元,總計過去3年燃油對沖合約已經累計虧損178.41億元。

若然今明兩年油價維持喺大概50美元一桶的話,今明兩年每年仍會錄得燃油對沖虧損逾80億元,五年夾埋即係要勁蝕近300億元;炒咗600人每年只係用公司區區3億幾,除一除條數,即係呢條數夠僱用呢班人成個世紀。

麥狄文(徐狄怡.證監會持牌人)

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads