2017年5月18日
恒生指數收報25293點,跌42點,成交696億。市場嘅記性愈嚟愈短,一個月前仲係驚緊美國北韓會開戰,而家隻卡爾文森號究竟去咗邊度,已經冇人理。任何嘅壞消息只要冇成真,市場即刻用市價消化晒,好似隻怪獸咁吞噬晒任何壞消息,要推冧股市,惟有一啲事前毫無跡象,聞所未聞嘅事件先有本事。
股市行先過經濟,經濟又行先過樓市。股票要升要跌,要買要沽,最快見效。股市唔好,影響好多人財富,亦影響公司做生意嘅部署,後果反映喺經濟活動。香港人層樓係最後防線,唔食唔着都會供樓,經濟持續不景氣,守無可守,惟有郁到層樓,所以要樓價跌,先要股市先跌,呢套骨牌先至會一層一層冧落嚟。上網可以睇到好多唔同人對樓市嘅分析,有睇升有睇跌,但如果講理據夠實在同扎實,睇升嘅扎實好多,原因係睇跌好容易,淨係升得勁已經係罪無可恕,一定會跌;升就唔同,升咗咁多,仲敢話升,冇番啲真實數據,點敢走出嚟講說話?
而家股市唔識跌,經濟係全民就業,肯做就得,洗碗50蚊一個鐘都請唔到人。最緊要係內地仲係買緊香港資產,無論係股票定樓房,你見中環寫字樓可以賣50000蚊呎,就知未來5年係乜嘢世界。
內地仲買緊香港資產
你會話,大孖沙唔可以睇錯市買貴貨咩?當然可以, 人當然可以犯錯,但係第一代嘅地產商依然健在,佢哋見過嘅風浪,同埋今時今日嘅心態,唔會鹵莽地行差踏錯。九份標書,八份都有港資參與,證明呢個投標價係計出嚟,唔係逼出嚟,港資地產商咁疊水,就算買咗件貴貨都唔死得人。
最重要係,有新地王嘅價錢,手上所有地產資源又即時升值,下年埋數又賺多咗錢。
港資咁多年儲埋咁多寶貴地產資源,有內地資金托市,又有真金白銀同佢哋買手上資源,就算港資唔再夠中資搶資源,手上嘅本錢都夠做多兩代。
放大圖片 / 顯示原圖
訂戶登入
下一篇: | 你犯錯我埋單? |
上一篇: | 「滬港通」及「深港通」上日收市統計 |