|
熱門:

2017年5月16日

方卓如 方如玉帥

懷疑嘅人受到懲罰

恒生指數收報25371點,升215點,成交812億。大市升到唔識停,而且唔止係騰訊(00700)一隻識得升。由大時代嘅高位超過28000點,跌一萬點去到大約18000點低位,而家已經反彈了7000點,回到大時代前的高位水平。但今日同大時代唔同,兩年前市場係靠放水同低息支撐,但今日市場已經預計加息同「縮表」。

市場不單止沒有恐懼銀紙收縮,連恐懼本身都冇,令股市愈升愈有。前輩話有懷疑,揸現金。過去兩年,股市同樓市都懲罰緊懷疑嘅人;你愈覺得貴唔敢買,市場就再貴啲畀你睇。

唔係逢沽空必贏

瑞聲(02018)再三澄清沽空機構報告指控,無助支持股價,繼續下跌。股價唔升,千祈唔好誤會市場一定係相信沽空報告而唔信瑞聲,因為公司股價今年其實升咗六成有多;剛剛公布完業績,加上有負面新聞,有賬面利潤嘅好自然會先行沽貨計數。但係你見每日都有二三十億錢成交,不外乎3個可能。有人夠晒信心睇好,你沽貨時佢接平貨;又或者有實力人士主持大局,維持秩序,實行學國家領導人看待「一國兩制」,要佢不走樣,不變形;再唔係,就是大戶托住股價,要佢軟着陸,等佢哋可以繼續沽。一份沽空報告,無論有幾真確,在啱嘅時間發放,又唔會辣到要公司停牌,仲引發到咁大嘅成交量,夠膽沽嘅全部都贏。

點解要講夠膽沽?因為唔係逢沽必贏。豐盛(00607)都俾沽空報告狙擊,狙擊到要停牌。但復牌後嘅股價,狠狠地升越沽空價。除非沽空機構有本事在停牌期間在場外以折扣價補貨,否則的話,復牌後要輸錢。輸錢在於做研究做得唔透徹,淨係研究狙擊嘅公司本身,唔研究埋狙擊嘅老細本人。遇着有實力嘅老細,並無一身街數,而且持貨較多嘅,梗係可以像二手樓價一樣,挾到乾升,令你血本無歸。但係呢啲情況唔多存在,因為沽空機構能夠借到貨沽,好大原因係老細已經將部分貨源抵押,市場先可以有源頭畀人借貨。如果街貨全部在強者之手,邊有機會借?遇着表面好似冇實力,骨子裏原來有力反撲嘅老細,只怪自己研究未深。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。