|
熱門:

2017年5月15日

方卓如 方如玉帥

股票係選票

TVB(00511)股東有特別安排,令特定股東有話事權。重要傳媒唔似係由香港人話事,先唔講有冇違規,肯定唔係香港人願見,但係社會上唔見有好大反彈,唔使一個星期就靜晒。哀莫大於心死,恐怕最危險嘅情況出現,香港人開始麻木,香港主要經濟命脈唔再係香港人話事,大家已經由抗拒到習以為常,再變成理所當然。攻擊一個社會唔一定用槍用炮,不戰而屈人之兵,古人智慧今日有新體驗。

勒索程式「想喊」WannaCry突擊全世界,人類要開始意識到現在正式踏入科技威脅嘅年代,以前未試過有咁廣泛嘅黑客攻擊,亦從未試過有黑客新聞上頭條;唔止係網上勒索,早前仲有懷疑俄羅斯黑客干擾美國總統和法國總統選舉,你生活嘅威脅唔止來自看得見嘅敵人,連上互聯網嘅物件都可以影響你。

目前係電腦才會普遍連上網,將來你對波鞋都識上網,𠵱家黑客只會令你唔見咗啲檔案,將來你對波鞋可以推你落樓梯。今日之前科技只係為人類帶嚟生活方便,今日開始大家就要警惕,科技是雙面刃,唔係只有嘆世界嘅一面。

科技股如雙面刃

買股票,科技股更加係雙面刃。近5年只有科技股可以持續上升之餘,上升嘅趨勢唔係慢行爬山,而係直升機爬升,升到你由唔信變信。

騰訊(00700)同阿里巴巴股價可以創新高,係因為佢哋係二十一世紀新壟斷行業,等於香港嘅地產商。壟斷行業只會愈嚟愈發,直至行業太霸道要受管制為止,但呢類新壟斷行業,資產唔再係眼見得到嘅地球資源,係一堆睇唔到嘅數據。數據本身可以唔值錢,識用先至值錢,但究竟邊間公司識用?仲識用嚟賺錢?而家大家用緊股票嚟投票,多人信嘅股價就升。

科技股嘅股票唔係股票,冇乜息派,冇乜資產內涵,其實係選票,你選緊邊間係明日之星?

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。