|
熱門:

2017年5月12日

方卓如 方如玉帥

沽空藍籌有方法贏梗

藍籌股都可以被沽空機構狙擊,問你怕未?瑞聲科技(02018)俾人話製造盈利,賺錢較同行厲害,股價即刻跌一成。但係情況同你平時見嘅狙擊事件唔同,股價並冇跌九成然後停牌,冇停牌亦即係唔會出現長期停牌令股東冇仇報。

能夠有咁平靜嘅場面,唔係因為公司真金不怕洪爐火,真假唔係重點,重點係公司並無手持七成幾嘅大股東,而最大嘅股東亦冇押貨借錢。咁嘅客觀環境,除非沽空機構有本事話公司盤數係假,入面一蚊資產都冇,否則的話,區區話人用關連公司推高盈利,盈利本身依然貨真價實,有乜好驚?如果沽空機構手上證據夠確鑿,話之你係藍籌,要跌九成都可以。瑞聲昨日還有近40億錢肯買,證明沽空機構手上嘅料唔夠驚嚇。

只係電視評論就笑死人,主持人問嘉賓點睇,嘉賓話呢啲關連公司無理由核數師睇唔到,最多係佢哋睇到但認為唔使披露。另一個仲搞笑,話大藍籌由四大會計師樓主理,佢哋咁大塊招牌,點會攞嚟較飛?

呢位嘉賓可能從另一個星球過來,唔知道Enron倒閉可以搞到大會計師樓執笠。唔講太遠,就講停咗牌嘅輝山乳業(06863),佢哋都係用名牌會計師行。早前在香港被清盤人索償而賠上天文數字和解嘅,又係四大會計師樓。嘉賓唔太留意新聞,用自己幻想出嚟嘅理由說服自己,希望佢一向唔買股票。

沽空機構向藍籌股開拖,本身先係值得探討,而唔係佢哋狙擊報告有幾真。沽空最忌停牌,你補唔到倉,蝕息,復牌後有機會被挾,可以係高風險生意,唔一定贏緊。但藍籌股,借貨容易,息口略低,雖然好難大跌九成,但好大可能唔會長期停牌,而且沒有莊家或大股東出資挾倉報仇,跌一成已經係大茶飯。

記住,沽空唔使落足本,成本只係利息同按金。跌一成,股東回報率(ROE)可以係用倍計。一日賺逾一倍,去邊度搵?

況且,冇莊家同絕大股東干預,有呢啲疑幻似真嘅沽空報告出籠,唔係冇人驚有人沽啩?跌幾個點畀吓面都得啩?只要你有本事兼夠膽寫兩三頁報告,必賺。

藍籌都有沽空報告,早前咪有高手整咗份老千股名單?佢哋份名單怕且要加到1000隻。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。