|
熱門:

2017年5月11日

方卓如 方如玉帥

只可以怪自己

恒生指數收報25015點,升126點,成交增至936億。大市由年頭升到而家,唔識停。股票價格係可以一條氣上升,因為公司生意係可以愈做愈大,上升無止境。騰訊(00700)、蘋果,甚至中電(00002)、領展(00823),你拉長條股價圖,佢哋由上升起點基本上一條氣上,冇斷過。但係大市就會上上落落,因為當中有好股票同壞股票,互相抵消,唔似個別股份可以行足十幾年大運。大市行到咁上下水平你可以沽空,但係個別強勢股千祈唔好因為佢貴就同佢鬥氣,你未必夠佢長命。

香港金融人嘅喪鐘

我師傅傳來一份剪報,話RO值錢過會計師。RO係Responsible Officer,每間持證監牌嘅公司,券商又好,基金又好,都要有兩個RO,出事嘅時候知道搵邊個負責。

師傅係高人,等於六祖以心印心法門講道,唔會拘泥字面。RO貴過會計師,我師傅一定係為我哋香港人嘆息,有感本地人在金融中心嘅位置漸入水尾,就快生靈塗炭無處容身。

而家RO起碼四五萬一個月,仲係唔使點做,淨袋。資本世界自由市場,有呢支歌仔唱?原因係中資大量買牌或自行申請,個個都做券商或基金,霎時間邊有咁多RO坐鎮?RO變咗殼股,供不應求,價錢上升。但係市場識啤殼,中資都識啤RO。假以時日,中資真正做嘢嘅人可以成為RO,佢哋袋四五十萬都得,點解仲要畀四五萬你?

如果真正攞個牌搵食嘅,使鬼做RO?隨便掛個經紀牌都得,又唔使做咁多行政嘢,又唔使孭飛。肯收四五萬做RO,幾乎係冇乜所謂,搵得幾多得幾多,準備收山嘅心態。衰啲講,肯收幾皮嘢唔使做嘢,大家心照,都係等金主嘅人夠鐘頂上。

換言之,咁好搵嘅RO筍工,其實係香港金融人嘅喪鐘,係即將被內地人全面取締之前嘅一封利是,亦係香港人金融工種即將排隊上刑場前食嘅最後一隻雞髀,收完同食完,就一個二個玩完。做RO要3年經驗,亦即係話,不出3年,呢類筍工就慢慢銷聲匿跡。金融中心嘅人淪落到對於呢啲坐喺度印印腳收幾皮嘅筍工沾沾自喜,我師傅嘅意思係,我哋只可以怪自己。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。