|
熱門:

2017年5月10日

方卓如 方如玉帥

恐慌指數跌至令人恐慌

恒指收報24889點,升311點,成交710億。騰訊(00700)愈升愈有,中電(00002)仲識得創新高,表示新經濟股同傳統公用股都有人買,正是邊個沽邊個輸。唔止香港升,全世界都升,恐慌指數跌至令人恐慌嘅低位,並非無因。

恐慌指數太低,叫人恐慌有突如其來嘅冧市。有咁嘅想法嘅人,唔會係市場中人,因為市場早前已經出現過兩次冧市。第一次係英國脫歐,第二次係特朗普當選,兩次都出現冧市,大家瘋狂掟貨,但當有人趁低撈貨之際,掟貨嘅覺得唔對路,拿拿聲買番。一而再,再而三,市場話咗畀你知,想買貨嘅人多過想沽貨嘅人。

一年前十幾萬億國債係負回報,就係錢太多但無處容身,揸到尾負回報都在所不惜,等候機會。兩次冧市都引人撲出嚟買貨,而家仲講大冧市嘅人,唔係讀壞書就係發緊夢。再有第三次冧市,唔會令人吃驚,只會令人驚喜,又有機會執平貨。

物業賣咗買唔番

狂印銀紙會引發通貨膨脹,低利率令股票投資收益變得吸引,通脹率高於利率嘅負利率效應,令資產價格上升。等咗好耐嘅通脹終於來臨,狂印銀紙嘅後果逐步出現,而家你要做嘅就係盡快擸多啲資產,減少手上現金。

喺香港,有物業在手嘅千祈唔好賣,經濟同稅制環境,令你賣咗買唔番。你見好多樓市專家,口中猛咁唱淡樓市,但唔見佢哋狂沽手上物業。行動最誠實,佢哋覺得樓市會跌都唔沽售物業,就係知道沽咗之後就算真係市跌,佢哋都買唔番,所以唔會摸頂沽貨,只會跌市再撈底。

錢多嘅後果,就係撈底嘅人多。股市同樓市一樣,唔好指望冧市可以畀你執平貨,因為捕喺河邊嘅鱷魚唔單止得你一條,而且其他鱷魚仲大隻過你,有筍嘢一定係佢哋食先,冧市執平貨嘅機會係唔會出現你面前。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。