|
熱門:

2017年5月9日

方卓如 方如玉帥

一個字:蠢

恒生指數收報24577點,升101點,成交667億。騰訊(00700)升1元,收244.8元。貴嘅股票可以更貴,有氣勢嘅股票唔好睇小佢。有人唔嫌貴依然繼續買,唔知買嗰個儍還是沽嗰個蠢。

股神呻笨,以前唔識睇科技股,走寶亞馬遜同谷歌。而家佢識睇,因為科技確定為支配人類未來生活,唔再係2000年吹水居多嘅科網年代。就算而家仲未識賺錢嘅Tesla,你都幾可肯定佢係未來主流,遲早成為汽車霸主。你買入一間而家蝕錢嘅公司,其實係落注買緊未來汽車嘅盟主,贏咗就賺幾十倍,輸咗就渣都冇。但相比起2000年,贏面高好多,因為畀得你買嘅,都係行內最top嘅,仲係你每日响身邊見到有人用嘅,其實等於以前啲價值投資,找尋身邊生活眼見嘅投資機會。

今期《經濟學人》講咗點解而家嘅科技公司咁值錢,原因係佢哋掌握了當今最值錢的地球資源──數據。數據本身唔值錢,但係識得由數據轉化成資訊就好值錢。

得數據者得天下

市值最大嘅科技公司,就係掌握咗最多嘅數據,而且與日俱增,愈收愈多。今日嘅數據,就等於上世紀嘅石油,同樣掌握地球經濟命脈。上世紀嘅石油係天賜嘅,你有就有,冇得羨慕;但今日嘅數據係可以搜集,冇人有專利,數據可以唔同人同時掌握,能否轉化成資訊就靠個人智慧。所以今日嘅致富條件其實比你父輩雄厚得多,唔係靠天然資源,唔係靠家族遺產,可以靠單人匹馬,兩隻手打天下。前提係,你要望前面,唔係後面。睇歷史研究成功方程式,輸死你,因為未來發達之道,以前從未發生過;而過往發達之路,今日已經封死晒。

所以記者問股神點解唔一早買亞馬遜,佢老人家嘅答案只得一個字:蠢。

蠢在用佢以前用開嗰套去衡量投資價值,發覺舊嗰套行唔通,已經錯過盈利最豐厚嘅時間。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。