熱門:

2017年5月8日

高仁 財圈識真假

揭露莊家操盤手法

在2016年中「識破上市公司成仙成妖之路」系列文章,高仁比喻公司由「凡夫俗子」到正式「出家」(上市),先修煉拆細及送紅股「秘笈」(財技),股價爆炒無以為繼,之後再修煉合股及供股「秘笈」,最後正式升仙。

講到股份升仙成妖,各位「巴打」一定會相當痛恨莊家股,莊家股通過拉高股價請君入甕,散戶接火棒後又隨即高位掟貨,損失可以非常慘重。本文,高仁將會與一班「豬朋狗友」,揭露莊家的操作手法。

在披露對話實錄之前,請各位「巴打」與「絲打」重溫人物背景,簡介如下:

戴孤劃──又稱為戴Sir,《信報》「蠱壇辨虛實」專欄作家,上市公司大股東,經常欺壓小股東。

程更計──本地證券行經紀兼財務顧問,除了招呼散戶之外,亦向上市公司出謀獻計。

高仁──自從推出「升仙成妖」系列之後,有「巴打」話我知莊家股一樣害到佢哋雞毛鴨血,好想知道莊家股嘅操作手法。

戴孤劃:阿程,你做證券比較in-the-market,不如你幫幫手打救班「鐵哥們」(註:戴Sir又再打廣告),解構一下莊家股。

程更計:好,冇問題。要成為莊家股,第一步要做到股權高度集中,即係市場流通量少。

高仁:係呀。譬如話,表面上大股東持股75%, 市場流通量有25%;但實際上流通股份可能連10%都冇,總之少得可憐,咁就可以方便操控股價。

戴孤劃:那麼(戴Sir又用普通話賣廣告),莊家買貨啲錢通常喺邊度嚟?

程更計:啲錢係大股東自己或者借返嚟,佢哋通常好少會自己親身上陣做莊,有可能搵手下或者friends幫手,但通常搞得唔係咁好,所以大多數會搵證券行、金融機構或「資本系」去操作。

高仁:莊家股嘅買賣盤都係同一班人,加上市場流通量極之少,你買我賣去踢高個股價,莊家就可以全權操控股價。

戴孤劃:大股東用錢把股價打上去,最終目的應該都係想套現啫,莊家會有乜嘢方法?

莊家股套現4招

程更計:各位「巴打」(此話令高仁凝望着阿程), 一般來說,莊家股可以有4種套現方法【表】,其中兩種同大股東有關,另外兩種同上市公司有關。第一種係大股東直接減持股票,但前提係要搵到願意高位接火棒嘅「魚」先得。第二種就係大股東抵押股票套現,當有金融機構願意接受抵押,大股東心裏知道股價係自己打上去,如果抵押出來嘅錢高於股票應有嘅價值,佢哋就會索性唔還錢,直頭畀金融機構斬倉。

例子:假如一家上市公司股價長期處於1元,按照正常抵押率20%計算,只能夠抵押出0.2元貸款;但如果莊家把股價拉高到5元,就可以抵押出1元貸款,相當於原來股價直接賣掉套現。此時此刻,大股東自然會考慮不還錢,讓金融機構直接斬倉。

高仁:第二種方法咪好似做保健食品公司嘅case,莊家大幅拉高公司股價至過百億市值,大股東之後攞啲股票抵押借錢,最尾疑似冇錢還,索性畀券商斬倉。

程更計:係呀。第三種係上市公司趁坐莊股價上升之際,同資本市場講會有新業務或轉型等故事,吸引機構投資者注意,之後發新股集資。第四種同第三種相當類似,就係利用債券融資,例如發行CB。

戴孤劃:阿程,第三種同第四種圈錢方式,啲錢係於屬於上市公司,落唔到大股東口袋喎!

程更計:唔使擔心,莊家會提供一條龍服務,有不同併購項目任君選擇,上市公司嘅錢繞咗一圈,最終都會返去大股東嗰袋度。

戴孤劃:咁樣睇嚟,我入埋「資本系」都唔錯喎!我聽聞,內地有6大活躍嘅「資本系」,到底係邊幾個呢?

高仁:阿程都講到喉乾啦,等佢飲啖茶、食個包, 之後先再講啦。

講完香港,「巴打」知不知道內地一樣有「莊家」?又美其名為「資本系」呢?

本欄逢周一刊出

歡迎交流上市公司的財技個案及招數,請電郵至 [email protected] 

 

(編者按:高仁著作《高仁財技--投資自由行》現已發售)

歡迎訂購:實體書

 

放大圖片 / 顯示原圖

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads