|
熱門:

2017年5月8日

方卓如 方如玉帥

新一代必需品

股神開股東大會,成為一年一度嘉年華。香港嘅股東大會都係嘉年華會,小股東都係非常踴躍,不過佢哋唔係想聽主席有乜嘢發表,而係到場搶嘢食。香港小股東幾坎坷,大拿拿攞錢出嚟買股票,要撲出嚟搶嘢食來提高回報,淒涼。

股神股東會有嘢食有嘢玩,但亮點還是聽佢說話,學嘢。股神今次轉軚,由以前話唔識睇科技股,到而家大讚亞馬遜創辦人係商業天才,做得咁成功。佢讚嘅呢個人肯定會超越佢老人家,成為世界二富。事實上,美國市值最大最有活力嘅公司全部都係科技公司。股神再唔學識睇通科技公司,必然落後大市。佢醒,睇價值好難解釋咁高嘅市值,惟有睇人,睇人就冇得挑戰佢。

香港要買只有一隻騰訊

本來買可樂,買卡夫,主要係日常生活必備品。今時今日嘅必備品,已經變為手機、網購、互聯網。貫徹股神嘅買股策略,呢啲新一代必需品點可以唔買?

香港唔興買美股,要買新必需品股票,只有一隻騰訊(00700),咁你而家明白點解騰訊屢創新高。同科網股年代唔同,而家嘅科技股係有盈利,而且睇得出會愈賺愈多。就算未有錢賺,佢哋嘅生意睇到係愈做愈大,例如Tesla,將會殲滅傳統對手。好多人搞唔清,以為盈利係分析股票最王道嘅工具,錯晒,大把有盈利嘅公司的股票冇人買,價錢又唔升。香港我可以搵啲PE兩倍嘅公司畀你,但係唔見人會瘋狂搶購。買股票同買樓唔同,買樓可以自用,買完住佢五六十年,唔賣又如何?就算冧市都唔關你事。股票唔同,你唔可以食落肚,必定係攞嚟賺錢,買嗰刻就諗定有冇下手接。要吸引下手肯接,就要下手肯相信接完之後仲有上升水位,最容易令下手相信嘅,就係公司有盈利,呢個社會共識,愈賺錢嘅公司股價愈升,人人都入晒腦,但從來冇人問點解。

股神出道嘅世界,比較簡單,做生意穩打穩紮,賺錢派息,天公地道,絕無而家嘅生意可以唔使10年時間顛覆傳統行業,殲滅同行對手;而家你買股票,唔好睇佢賺幾錢,睇佢有幾霸道,香港嚟講,仲唔係騰訊最惡?

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。