熱門:

2017年5月3日

麥狄文 金融街密語

巨頭聯手 天下我有

上月底中電信(00728)宣布,跟雲端數據同埋多租戶數據中心開發商Global Switch(GS),連同中國數據中心基礎設施營運商北京德利迅達科技,就數據中心建設簽署合作框架協議。呢單刁話就話上月底簽約,其實合作三方早於舊年年中已經拍晒膞頭,傾晒偈。而北京德利迅達科技話就話去年底先喺米字旗國首富、印度裔魯本兄弟(David & Simon Reuben)手上買入GS一半股權,原來呢單交易,德利迅達嘅致勝王牌竟然係中電信。

話說當時除咗德利迅達,原來超人旗下嘅電訊平台亦曾跟魯本兄弟接洽,表示有意買入GS股權。GS講到明搵新股東入場,係協助拓展亞洲市場,以為德利迅達大有優勢,成單收購只係等緊阿爺開綠燈同埋融資安排,德利迅達坐定笠六順利入股。

不過當時新一代鐵娘子文翠珊以安全跟經濟問題考慮,叫停咗具中資背景嘅欣克利角C核電站計劃,而GS呢單刁,極有可能引發新爭議,或應該要先審查交易可能涉及嘅安全風險,再決定交易對手係邊位。咁嘅情況下,以為超人旗下嘅電訊平台較全屬中資背景嘅德利迅達更有優勢,偏偏最終都係由中資財團跑出。

使德利迅達成功入股嘅王牌,原來關鍵係中電信,GS最終能夠跟中電信合作,就係畀德利迅達入股嘅條件之一,最終三方就數據中心建設簽署合作框架協議。而有關合作框架協議闡明各方嘅合作意向,未來各訂約方將會磋商合作形式的細節,並適時訂立進一步具體合作協議。而中電信跟一東一西兩個數據中心營商達成戰略合作協議後,將有助中電信國際客戶享受穩定同埋安全嘅數據中心設施和服務,助力其國際發展。

中電信雄心勃勃走出去

事實上,中電信國際喺海外嘅部署「雄心勃勃」,目標成為全世界服務供應商,預期未來將會透過自行建設、併購合作等方式發展。暫時「一帶一路」建設的13個通道當中,中電信國際已經覆蓋當中12條通道,能夠與其合作,已經有先天優勢。

GS老闆兩兄弟高度重視跟中電信嘅合作,打孖齊齊嚟香港出席是次合作嘅簽約儀式,聽聞來港期間有人身體抱恙,要漏夜急call醫生睇病,幸好都係虛驚一場,終於簽約順利進行。

由於呢單刁開始有眉目之際,剛剛係米字旗國脫歐之後,德利迅達入股GS價格係以英鎊找數,脫歐之後英鎊大跌,德利迅達慳番唔少。如今三大巨頭拍住上,將來喺數據中心業務方面可以話天下無敵。

麥狄文(徐狄怡,證監會持牌人)

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads