2017年4月5日
眨吓眼2017年首個季度已過去,2017年第一季港股表現唔錯,累計升幅接近一成,不過成交額方面未見顯著增加。阿Man同唔少行家吹開水,都擔心今年個市好睇唔好食,皆因去年港股市況麻麻,唔少行家都話收入縮水,若然今年情況冇改善,擔心行業陷入寒冬期。
睇番舊年港股日均成交按年大減37%至669億元。喺聯交所參與者中,根據每月成交額分為A、B、C組,成交首14位的經紀行為A組、15至65位為B組、其餘為C組。
睇番舊年市況,截至去年底止,聯交所參與者平均淨盈利,按年計下跌六成至75.87億元,估佢唔到係一向佔市場成交額最多嘅A組經紀,去年淨盈利得番5.07億元,按年跌幅達九成。至於以小型經紀為主嘅C組經紀,競爭力一向較弱,預咗生意難撈,盈利亦跌咗八成至13.26億元。反而夾喺中間嘅B組經紀,淨盈利按年只係跌21%至57.54億元。
內地客戶坐擁最多資金
B組經紀嘅業務表現能夠跑贏C組經紀唔意外,由於C組主要為本地薑華資行,規模同資源有限,無論人力物力都較為遜色,競爭力自然較低。C組經紀嘅自營交易方面由盈轉虧,2016年蝕22.12億元,2015年則賺25.5億元。奇怪係國際級嘅巨無霸A組經紀,竟然落後B組經紀幾條街,呢個統計數字令唔少業內人士大跌眼鏡。
以外資行為主嘅A組經紀,生意大倒退主要係唔見咗好多大型新股生意,尤其係內地企業嚟港股上市,寧願搵有中資背景嘅B組經紀合作。至於一般股票買賣同證券融資生意,大行只為藍籌提供融資、孖展等,提供證券融資彈性遠遠不及B組經紀,呢方面亦大大蠶蝕A組經紀收入來源。
B組經紀舊年嘅其他收入,按年上升逾兩成至102.24億元,有效地抵銷咗股票買賣業務跌幅。其他收入係撇除代理客戶股票買賣嘅佣金收入以外嘅收入,包括集團公司之間嘅管理費用、投資顧問費用、資產管理費用,包銷費用及企業融資收入等。
B組經紀呢方面嘅收入大增,主要係近年B組經紀積極拓展內地客戶生意,除咗着重內地客戶喜愛嘅網絡金融服務,落重本大搞Fintech之外,唔少B組經紀都搵內地合作夥伴拍住上,好似跟管理內地私募基金嘅資產管理公司合作,甚至引入內地財團資金,加強公司孖展融資財力,增強本身競爭力。
聽聞唔少服侍內地資金嘅資產管理公司,由於喺投資過程當中,投資決定往往由客戶本身話事,又或者由合作開嘅經紀提供新股投資嘅一條龍服務。所以依家唔少資產管理公司,已經冇資格收取基金表現費,每年僅收取基金管理費,所謂基金經理,早已淪為落盤工具。
不過,近年喺投資市場上,仍然係內地客戶坐擁最多資金,無論係經紀或者基金經理,服侍一個內地客戶所得酬勞,往往等於幾十、甚至過百個本地客戶,B組經紀能夠脫穎而出,亦深明背靠祖國呢個道理。
麥狄文(徐狄怡,證監會持牌人)
訂戶登入
下一篇: | 今季逢低收集 待利好因素發酵 |
上一篇: | 再談人工智能和基金管理 |