2017年4月3日
各位「巴打」,高仁不經不覺連續第7年在《信報》「開壇作法」,除了拆解上市公司財技招數的文章叫好叫座之外,甚至全新開拓的「財金『巴打』衣着」系列文章也廣獲好評。
大家可能對衣着「升呢」(升level)已感到相當滿意,但畢竟各位財金「巴打」的身形、面形等都有所不同,本文高仁將會進一步講解型、英、帥的衣着配搭竅門。
在披露對話實錄之前,請各位「巴打」與「絲打」重溫人物背景,簡介如下:
戴孤劃──又稱為「戴Sir」,《信報》「蠱壇辨虛實」專欄作家,上市公司大股東,經常欺壓小股東;
程更計──本地證券行經紀兼財務顧問,除了招呼散戶之外,亦向上市公司出謀獻計。
程更計:高仁,你介紹嘅財金「巴打」衣着相當實用,真係抵你啲文章有咁高hit rate!
肥人避免穿寬大款式
戴孤劃:(高仁按:戴Sir在「葡萄」中)好就係好……不過,每一個人高矮肥瘦都唔同,會唔會有啲不同身形同面形嘅衣着配搭建議呢?
高仁:當然有啦!如果好似戴Sir一樣心廣體胖嘅「巴打」,我建議冬天時最好穿着羊毛或棉質大衣同細針針織衫,避免穿着羽絨外套或粗針針織衫等含有空氣嘅物料,以免俾人一種臃腫嘅感覺。
戴孤劃:唉!我都知道自己體型比較寬大,所以外套一定會揀較薄墊肩嘅款式,而長褲就一定會避免揀寬大嘅款式,務求好似意大利型男咁,可以展現出優秀嘅倒三角線條【圖1】。
程更計:Great!戴Sir做得好好呀!高仁,我有啲「同事」個子唔夠高大,有乜嘢衣着配搭可以補救到?
矮小宜穿窄褲管貼身款
高仁:(暗笑中)阿程,你係幫「同事」問嘅,係咪?上身方面,我建議要揀串口線(註!即區分上領片(collar)與下領片(lapel)嘅分隔線)較高嘅外套,去拉高其他人嘅視線水平,以俾人身形高挑嘅印象【圖2】。下身方面,我建議要着窄褲管兼貼身款式嘅長褲,而褲腳要離地7至8厘米。咁樣褲管就唔會彎曲皺褶,而褲管筆直嘅燙痕,可以營造出拉長身形嘅效果【圖3】。
戴孤劃:除咗人矮之外,頸短又點算呢?
高仁:如果條頸較短嘅話,「巴打」就要揀細衣領嘅恤衫嚟着,因為大衣領嘅裇衫捲曲感太重,就好似一幅城牆圍喺條頸到咁【圖4】。
程更計:由頸再向上睇,每個人都會有唔同嘅面形,咁着衫又要點配搭呢?
高仁:我相信財金「巴打」放假時都會着吓tee,其實不同領位嘅tee可以稍為修飾面形。闊面、圓面嘅人較適合着V領、U領tee,因為佢哋嘅領口形狀較長,有向下拉長延伸嘅效果。下巴較長嘅人較適合着圓領、亨利領嘅tee,因為望落去塊面可以會短啲。
程更計:高仁又袋錢落我哋袋,真係多謝晒!
講完「巴打」要照顧一下「絲打」,「絲打」都知道SPF 15的防曬產品,但知不知道PN 15是什麼呢?有待下回分解。
「財金『巴打』衣着」系列文章
本欄逢周一刊出。
歡迎交流上市公司的財技個案及招數,請電郵至 [email protected]。
(編者按:高仁著作《高仁財技--投資自由行》現已發售)
歡迎訂購:實體書
訂戶登入
下一篇: | 爪哇重組財技 「三贏」可成教材 |
上一篇: | 新官上任跟紅頂白 |