熱門:

2017年3月22日

方卓如 方如玉帥

最興講過嘅嘢唔認

「方帥,最近成日見到你喎,你博乜?」

「草蜢仔,好醜命生成,就算你係隻樣衰嘅漆黑中的螢火蟲,想安靜地匿埋一二角都唔得。我幾十歲人,最想就係快啲買層400呎嘅樓,返屋企有人煮飯畀我食,食完飯同啲小朋友玩,臨瞓前追埋套Game of Thrones,咁就夫復何求咯。」

「唔係啩,方帥,你係真唔係?我睇你fb,全部都係啲周圍去玩嘅相,啲嬲嬲真係上晒個鼻度,你嘅理想竟然咁貼地?」

「人老咗,就知乜嘢叫做最高境界。你做呢行成日炒炒賣賣,去電台接受訪問都要睇住部手機留意個市,見到持倉好似美圖秀秀還原之後咁不堪入目,你又乜都做唔到,嗰陣時你真係想唔好搞咁多嘢,專心坐响公司搵錢算數。後生就話想試多啲嘢,老咗就想只係做一樣嘢。

「買樓更加係你成熟唔成熟嘅表現。你投呢樣,買嗰樣,唔及嗰個有錢就買樓、英文字都唔識多個嘅同學仔。買樓唔止會發達,仲可以幫你趨吉避凶。以往幾次大浪冚埋嚟,樓價下跌甚至大跌,總有一日會見家鄉。冇錯,有機會仍然蝕,但絕對唔會變牆紙,有租收仲可以讓你慢慢捱。買股票收息有除淨,意思係羊毛出自羊身上,你收嘅息其實係股價嘅一部分;買樓收租不單止冇除淨,而且保證將來一定向上,假以時日你唔再係收3厘息,可以係10厘息!

「後生嘅時候你覺得自己天下無敵,識錢搵錢,有錢梗係留在手。但廿年後你發覺,錢搵錢唔容易,戇居居買層樓,幫你搵得仲多錢。買樓發達其實唔係香港獨有,只係香港將佢發揚光大。老人家寄語年輕人唔好俾500呎綁住青春,但當你失去青春之後,就會眼紅嗰500呎。」

「嘩,方帥,你成個人唔同晒嘅,講嘅嘢完全唔似你。我跟你㗎,真係會跟足你吩咐去人生規劃,唔好跣我呀!」

「挑!草蜢仔,你咁離地,你唔知而家最興講過嘅嘢唔認咩?」

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads