|
熱門:

2017年3月17日

畢老林 投資者日記

贏死? 輸死!

3月16日,周四。「神奇小子」曹星如21連勝,香港人講足幾日依然血脈沸騰唔停得口。華爾街這兩天最多人講嘅話題就唔多光彩。邊單嘢?大家想必已猜到幾分。

不錯,老畢說的乃對沖基金明星阿克曼(Bill Ackman)【左圖】輸大錢。「寸嘴鱷」坐艇坐足年幾,終於扯白旗投降,一次過沽清旗下對沖基金Pershing Square和以個人名義持有的合共8%加拿大藥廠Valeant,埋單計數狂蝕30億美元!

栽得徹底

30億美元即係港紙200億過外,一項投資可以輸足200億,與其賴公司衰累佢蝕鑊甘,不如直認此乃個人問題,怨天怨地無補於事。

Valeant如何從一隻名副其實的基金愛股,淪為地底泥不如的「蟹貨」,本報EJ Global(金融)周三已有圖文並茂的報道。然而,作為投資個案,阿克曼呢鋪栽得徹底,能給我輩什麼啟示?

從康寶萊(Herbalife)到Valeant,不論做Short定做Long,阿克曼都堅持「寸嘴」作風,死不認錯。2015年是對沖明星灰頭土臉的一年,與阿克曼一樣咁黑、有「Long/Short王」之稱的艾恩霍因(David Einhorn),幾乎Long邊隻跌邊隻,Short邊隻升邊隻,但艾恩霍因humble得多,識檢討冇死撐,這類人方有可能哪裏跌低哪裏企番起身。

反觀阿克曼,「檢討」唔係冇,但結論是「基金買入的公司質素非凡,無奈市場不認同。錯嘅唔係Pershing Square,係市場!」

一鋪清袋

耐性跟固執不能畫上等號,但兩者往往只差一線,如何在一時運滯與大錯特錯之間作出準確判斷,確實考起許多投資高手。睇番轉頭,係人都知Valeant早沽好過遲沽,阿克曼錯不在沒有先見之明,而係唔承認自己乃「凡人」一個,不可能沒有犯錯空間,且在市況不利時拒絕檢討原先看法,不斷在同一隻股票身上加碼,到了不得不面對現實那一天,以往賺埋賺埋分分鐘唔夠一鋪蝕。

畢非德拍檔芒格(Charlie Munger)曾對這類「執迷不悔」之輩打了一個十分「貼地」的比喻,佢話你不必懂得如何分析這類人的心理狀況,只須看看歷史上有多少「死牛一邊頸」的人破產,便不會有樣學樣摧毀財富。

「寸嘴哥」乃睇準就重錘,一係贏死一係輸死那類投資者,能在叻人無數的對沖基金業立下輝煌戰功,身手總有番咁上下。問題是,押重注的公司一再出亂子,劣行遭第三方如沽空機構踢爆,持貨風險盲嘅都睇到,偏偏只有他給當初瞓身買入的理由蒙蔽,輸得愈多愈覺無法向自己和客戶交代,結果投入的錢一增再增,期望終歸有日大翻身,連本帶利一次過賺回來。

執迷不悔

阿克曼在投資上的「執迷」,是否就是行為心理學家所說的「確認偏誤」(confirmation bias),留待識者評價。老畢只覺得,他的行為跟賭仔求翻本小輸變大輸,散戶唔肯止蝕反而不斷溝淡,結果愈溝愈淡蝕得仲慘,本質上沒什麼分別。所不同者,老散冇資格學佢Short Put + Long Call,結果「草船借箭」失敗,焗住硬接910萬股,連同數以千萬計於更高價位買入的股份,一路坐到淒慘「斬纜」,成件事才畫上句號。

不知「寸嘴哥」因為靚仔定好命,唔認錯蝕大錢早有前科。換了別人,只怕「收工」好耐,佢卻有本事愈輸愈「寸」。

計我話,阿克曼點止對沖基金明星咁簡單,壓根兒就是投資界的「異數」!

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。