熱門:

2017年3月15日

麥狄文 金融街密語

搞上市唔成變搞離婚

好多上市公司未上市前都係家族生意,做到咁上下規模,成盤生意要發大嚟搞,發覺有集資需要,而公司盤數又夠秤上市的話,最好方法就係搞上市,喺資本市場借力打力。呢啲家族生意,唔少係子承父業,有啲甚至傳落幾代,白花油(00239)係一個例子。

至於有啲公司喺阿仔嗰代,將業務發揚光大,好似靄華押業(01319)咁,交到去太子手中,由傳統押業做到現代二叔公,仲要主打樓按,所以先要上市集資,結果生意梗係愈做愈大。又有兄弟班好似利郎(01234)咁,由王氏三兄弟王冬星、王良星及王聰星喺1987年創立,經過超過20年打滾,卒之喺2009年嚟到香港上市。當然仲有一種就係夫妻檔,而喺香港嘅上市公司裏頭,莎莎國際(00178)算係最為人熟悉嘅夫妻檔上市公司。

莎莎喺上個世紀七十年代由郭太喺銅鑼灣一間舖仔開始,其後不斷擴充,直至郭生連鐵飯碗都捨棄,全職大搞莎莎,兩公婆齊齊打江山,到1997年把公司上市。

難得嘅係莎莎成功之後,夫婦倆喺人前人後都咁恩愛,而郭生亦從未有傳出任何緋聞,係名人圈出晒名嘅模範夫妻。好似郭氏伉儷咁可以一齊捱,又可以共富貴當然好,但阿Man亦見過有夫妻檔,未上市前仲好哋哋,為咗搞上市,最終離婚收場,為咗利益反目成仇。

話說有間夫妻檔經營嘅公司,業務模式唔錯,有發展潛力,至於盤數亦見得吓人。兩夫妻身邊唔少金融圈中朋友,認為呢幾年上市公司殼有價有市,趁呢段時間把業務搞咗上市,一來兩公婆可以將檔生意變現,二來個殼可以善價而沽,賣咗隻殼又可以買番檔生意繼續搞,雖然話公司上咗市,但話事人都係佢哋自己,既可以喺資本市場撈一筆,班老友又多單「刁」做,一家便宜兩家着。

一個「錢」字勞燕分飛

其實搞上市同搞結婚差不多,當中所涉範疇甚多,亦需要與不同單位溝通合作,若然期間有乜誤會,準新人搞結婚不歡而散嘅例子多的是,原來搞上市情況差無幾。

呢對恩愛夫妻,聽完金融圈老友建議後,開始着手搵人籌備上市。不過一開波問題已經出現,兩個擁有同等數量股權,即係各佔50%股權,單係僱用邊一個上市團隊已經各持己見,各不相讓。原因係有人為咗一己私利,要成功搶呢單IPO生意,分別向老闆同老闆娘洗腦,又話咁咁咁至可以保障到老闆利益,轉頭又乜又物話係為老闆娘你好,一時間二人各自為咗保護自身利益,不僅唔相信對方嘅團隊,甚至係開始猜疑對方。

接住落嚟兩人日日嘈交,鑊鑊甘,唔使阿Man嘥口水交代細節,大家都估到故事發展落去係點收場。阿Man一啲都冇誇張,由搞上市變咗搞離婚呢單係真人真事,至於公司搞乜生意,阿Man就唔講喇,事關一爆出嚟,故事主角呼之欲出等同開名,既然唔係乜開心事,都係有所保留。呢對過氣夫妻檔生意最終梗係上市不成,好似仲有意拆夥,兩人唔單止已勞燕分飛,如今更形同陌路,講到尾又係為咗一個「錢」字。

麥狄文(徐狄怡,證監會持牌人)

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads