2017年3月14日
今晚特首論壇,究竟有冇上屆「你呃人」咁震撼?上屆電視論壇嘅時候,大局已定,邊個做特首,邊個陪跑,個個都知,所以論壇目的唔係為自己拉票,係要同對手玉石俱焚。
今次唔同,一個有八成信心,一個有十足把握,另一個仲寸,幾乎諗定點樣連任。個個都覺得自己有機會,咁嘅論壇就有睇頭。呢類論壇,莫講話對選委投票意向冇影響,就算係美國咁民主嘅選舉,辯論贏咗嗰個唔代表選舉都會贏。但香港嘅奇怪之處係,辯論有助民望,高民望嗰個選唔上,叫人唔心服嘅程度係高過美國贏咗總票數但輸咗選舉人票。可以想像,如果而家係直選,兩個得到過半提委會支持嘅候選人,總有一個自願捱打,讓真正得到支持嗰個盡量表現。今晚可能係你有生之年唯一一次見證真正嘅辯論,全部候選人都係以勝選為目標。往後要睇真正嘅選舉辯論,難矣。
經濟學家或者政策制訂者,最叻係掌握數據,但最唔掂嘅係了解人心。經濟學其實係研究人類如何生產同分配資源,但係人類行為從來無得預測,亦唔一定由理性出發。象牙塔嘅學者閉門造車,點會知道實際社會人類嘅諗法?日本通縮,愈放水利息愈低,日本人愈唔敢使錢。同一項政策放响美國,經濟即刻回復起色。而家香港人恐慌性買樓,又一次打倒經濟學家嘅分析,正如天水圍師奶叫啲專家去食「二百蚊車馬費嘅捐贈物」。買股票可以非理性,但買樓係絕對理性,因為過程要一段時間,唔似股票撳個掣就買到。過程咁長,任何沖昏頭腦嘅因素都會被時間消退。銀碼又大,任何人動用咁大筆資金,借咁大筆錢,一定係諗得好清楚,好難係一時衝動。你可以話係羊群效應,但呢班羊群都係諗過度過先跟大隊。
恐慌性買樓係完全理性,因為樓價係同普通人嘅購買力脫節。任何人越級挑戰,買一件自己要節衣縮食嘅資產,孭上一條還半世嘅債,咁恐怖,點會唔諗到清清楚楚?咁多人嘅理性行為,佢哋係代表咗整個社會嘅集體意志。
當經濟學家話加息重臨、供應增加、北水減退,全部都會令樓價調整,恐慌性買樓就話畀大家知,現在所有資產購買力獨沽一味,只會繼續買樓。
訂戶登入
下一篇: | 日中港樓市命運 |
上一篇: | 「滬港通」及「深港通」上日收市統計 |