熱門:

2017年3月3日

方卓如 方如玉帥

你應該驚而唔係興奮

特朗普國會演說之後,道指衝越21000點,佢單人匹馬就令道指升咗3000點,前無古人,而且升勢未完。呢個世界唔會咁筍,4個月前大家仲係一籌莫展,唔敢加息怕推冧金融市場。全世界銀紙冇出路,衝入去買國債,買到有13萬億美金嘅債券係負回報。4個月後嘅今日,3月加息機會係八成嘅同一日,道指升到歷史新高,突然間加息唔止唔會推冧個市,仲大受歡迎令股市暢旺,負回報嘅國債,更跌到8萬億樓下。經濟在短短4個月時間內可以由奄奄一息變成朝氣勃勃,too good to be true。

雖然特朗普帶咗共和黨人執政,但係有關經濟理論講緊都係同一套。邊個上台,都係搵高盛嘅人主理財金政策;邊個黨話事,佢哋識嘅嘢都係一樣,唔存在邊一派有啲獨門武功對家唔識。雖然民主黨係左膠大愛,唔排除做啲損己利人嘅事,但未至於蠢到原來有條可以扭轉美國經濟,等美國可以安全加息嘅絕橋都唔用,肯定而家突然上升3000點,全球拋售債券,提速加息都係糖衣毒藥,有景轟。

自2008年開始全球印錢放水,世界嘅銀紙愈嚟愈多,大家都擔心超級通脹。超級通脹係摧毁一個國家經濟嘅最強武器,你睇委內瑞拉,經濟崩潰,資源缺乏,外滙儲備由2015年200億美金跌到而家只剩下100億美金,佢嘅通脹係16倍。當大家估計通脹來臨,印多咗嘅銀紙原來只令到債券價格通貨膨脹,冇流入實體經濟,銀紙急速流動,通脹似有若無。但係4個月後嘅今天,銀紙拋售債券,買入股票,就係預期銀紙流動會加快,靜咗好耐嘅閒錢開始撲出嚟。

通縮可以係螺旋向下,通脹都可以螺旋向上。銀紙係會跟風,當你見到隔籬買嘢,價錢上升,你自不然走去又買。買完就升,升完追買,愈買愈貴,通脹就逐步來臨。股市無懼加息,就係因為特朗普放了隻通脹預期嘅怪獸出嚟。如果4個月後嘅今日,經濟唔係真係好轉,但通脹已經殺到,相信下一個委內瑞拉好快就出現。

上一手美國政府點解加息永遠都綁手綁腳,就係唔想捏死其他國家。而家嘅美國政府不理別國死活,搬番啲廠返美國,製造100萬個職位,表示別國減少了100萬個職位。

點解道指創新高而恒指掉頭下跌?好正常,美國好,其他國家應該衰,指數背馳係應該,一齊升只係炒股票,炒完當然要跌。

美股創新高,香港樓價又創新高,你應該驚而唔係興奮。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads