熱門:

2017年1月12日

方卓如 方如玉帥

提升到另一層次

兩位司長好可能前後腳辭職,但遲走嗰個,即到最後關頭先至不得不重新考慮嗰個,竟然可以率先讓人透露邊個係助選團隊,以一個正如佢親口所講從未參與過競選嘅官員來說,可算是高效率有為至極。兩位司長如果真係對陣,唔知佢哋在競選過程會點樣互相攻擊。

過去4年幾香港撕裂,但係未來5年亦唔見邊個司長做特首香港就會團結,恐怕香港未有民主就已經步西方民主社會後塵,社會長期五五波,一半半,左右互不相容。

報載金錢之王而家專攻殼股,錄得優於大市回報,字裏間似乎暗諷金錢之王降格。不過,計我話,應該係升格先啱。

我問你,你買中大藍籌贏錢嘅機會大啲,還是買中殼股賺到甩轆容易?唔使我開估喇啩,你瞇埋眼買滙控(00005),走去買領展(00823),蝕咗價錢,點都有息收,唔貪心嘅,升幾格走人,你想保持買股贏錢紀錄百分百,買大藍籌絕對可以讓你成事。

買大藍籌基本上連功課都可以唔做,是但一隻都可以令你變成有track record嘅民間金錢之王。

發掘殼股難度高

殼股就難度高幾皮。我問你,邊隻係殼股?你一定答唔出。你用坊間慣常用嘅路數去捉,例如低市值、輕資產、長期蝕本,你按照呢啲路數去買殼股,我肯定你十隻有九隻都買唔中。最近賣殼嗰啲,市值一啲都唔低,而家你見到市值低嗰啲,老細多多錢都唔會賣。靠呢啲枱面研究找出殼股企圖發大達,正如我所講,如果咁容易嘅就唔會咁多專業窮人。

找尋殼股先係超高階嘅投資行為,代表你人脈廣闊,老細識得多,而且仲係深交嗰隻,知佢嘅為人。對公司情況瞭如指掌,連股權分布都了然於胸。殼股唔係一啲閉門讀書研究睇字嘅人搵得出來,必定係市場中嘅市場人士先知道邊隻係殼,有幾急賣,同會點賣。你搵到有人原來係投資殼股嘅高手,應該攬住嚟錫,千祈唔好放手,因為佢唔止冇降格,反而仲提升到另一層次。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads