2016年12月28日
金融科技(FinTech)係唔少國際金融城市近年致力開拓嘅範疇,不過唔少缸邊友都認為,作為頂尖國際金融中心,香港嘅FinTech水平遠遠落後,就連亞洲區內對手獅城都行得快過香港,好似金融科技監管沙盒(FinTech Supervisory Sandbox),香港都係執人口水尾。
不過,之前財經事務及庫務局局長陳家強就曾反駁,仲話香港係金融科技初創企業同埋現有金融機構嘅理想平台,發展FinTech絕對係不甘後人。究竟係得把口講,定係有事實證明,阿Man可以話畀大家知,強哥講嘢絕對有根有據,皆因香港確有中國民企以香港作為平台,大力發展FinTech,仲要做FinTech一哥。
電子證書認證明年啟用
講緊嘅係啱啱通過改名做「民眾金融科技控股有限公司」嘅民眾金服(00279),公司易名唔係整色整水得把口,而係身體力行大搞金融科技。民眾金科過去30年一直從事金融服務,為咗順應全球市場大趨勢,積極開拓「互聯網+金融」嘅新業務模式。
第一步係推出全港首間非面對面網上開設股票戶口嘅平台「民眾交易寶」,呢個手機Apps,客戶可利用內地跟香港政府認可嘅電子證書認證(CA),完成客戶身份認證,短短幾分鐘就可搞掂身份核實,證券開戶如無意外5分鐘內完成。呢個Apps已經上咗架,將會喺2017年首個交易日(1月3日)正式啟用。
證監會喺今年10月明確表示,容許券商以電子證書代替筆簽完成開戶,其後內地公安部同本港郵政各自的子公司簽署備忘錄,為兩地居民進行身份驗證;同月,中證監亦批准根據CEPA框架下、「民眾交易寶」透過跟本港核證機構「電子核證服務」,以及內地核證機構「數安時代」合作,為中港兩地居民申請以電子證書,完成開戶程序。中港兩地監管機構開綠燈,「民眾交易寶」亦順利上架。
其實,利用CA核實客戶身份開證券交易戶口,唔係乜嘢新鮮事,10年前已有本地證券行推行過,只係當時智能手機唔普及,亦未有發展手機Apps,所以並唔流行。不過,唔流行唔代表香港冇咁嘅服務提供,10年前已有FinTech,香港喺呢方面一啲都唔落後。程式開戶唔單止可以做到隨時、隨地、隨意嘅方便,開戶成本每人只係幾十蚊,遠低於一般喺分行開戶成本要幾千至幾萬蚊。開戶成本平咗,民眾亦決定回饋客戶,減收交易費,孖展客買賣藍籌或國指成分股可以一世免佣。
聽聞喺民眾搞呢個Apps期間,話事人通過跟證監多次溝通先搞得掂,阿Man認為呢個「民眾交易寶」有機會成為業界參考標準,民眾可望將CA認證開戶發揚光大。民眾話事人更加向證監建議認可生物認證方式開戶。「生物認證」唔係乜嘢特別科技,就係透過手機利用指紋核實身份。
若然「生物認證」得到認可,咁就更加方便,而且指紋係獨一無二嘅,用咗指紋認證就可以杜絕「人頭戶口」嘅出現,相信證監會認真考慮。
麥狄文(徐狄怡.證監會持牌人)
放大圖片 / 顯示原圖訂戶登入
下一篇: | 2017否極泰來 |
上一篇: | 熊市末季例淡 港股明年尋底 |