熱門:

2016年11月2日

方卓如 方如玉帥

老細(你懂的)唔啱聽

政治一日都嫌長。美國選總統,臨近選舉日爆出希拉莉電郵風波要重新開快勞調查,今次真係驚。民主黨領䄂都要出聲批評FBI局長試圖影響選情,特朗普由民調大幅落後到最近相距收窄甚至接近,下星期真係有機會出現今年最後一次亦係最大嘅冷門結果。同英國脫歐一樣,市場一早price in熱門勝出,買中都唔會點升,隨時仲會跌啲,只不過冇冷門結果跌得咁勁。下星期,希拉莉贏唔會大升,特朗普贏肯定會跌。正路分析,沽定等結果,輸極有限。

沽定等結果

今期《經濟學人》有篇文章,指華爾街首次唔支持共和黨總統候選人,情形就好似香港嘅商界唔支持建制派。原因係特朗普一啲都唔似傳統保守嘅共和黨人,佢出身商界但靠激同民粹起家,華爾街冇辦法支持一個民粹嘅候選人。

呢個現象,美國財長Jack Lew講得好白,財富分配不均令全世界民粹抬頭,唔講經濟利益,只求發洩怨氣。財長話,平民百姓見到經濟數字增長都唔關自己事,生活質素並冇提升,仲點會受𠱁,支持一啲經濟發展為王嘅提議?留歐係保障經濟發展,就偏偏要脫歐,寧願窮,都要有權拒絕難民。對呀,就算經濟發展,你感受唔到;難民入境,你每日撞口撞面,邊樣更攞命?同樣道理,華爾街唔鍾意特朗普,佢會阻住人發達,呢啲正正係全世界人最想見到。如果脫歐最終成事,美國版嘅脫歐點會冇市場?特朗普宣揚要脫離自由貿易協議,同脫歐有乜分別?

民粹風一路吹到嚟香港,香港版本係,經濟發展益唔到香港人,起公屋係畀新移民,辣招係逼上車市民進貢地產商劏房盤,股票市場係傾斜中資讓佢哋予取予攜。香港人冇得選特首,惟有選冰島海盜黨嘅香港版。兩位青政議員唔係選入去做嘢,最主要係入去玩嘢。可惜,兩位用網絡世界講嘢毋須負責任嘅慣性思維入去立法會,凳都未坐暖,幾可肯定會俾人踢番出嚟。佢哋冇特朗普咁好彩,可以同樣亂講都冇問題。

因為分別在於,特朗普亂噏但係慘得過老細(美國人民)啱聽,而青政議員亂噏,老細(你懂的)唔啱聽。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads