熱門:

2016年10月26日

麥狄文 金融街密語

分析員向偶像取經

早幾個月喺暑假時,阿Man曾經喺〈做投行有苦自己知〉一文內提過,投行研究部唔易做,今日個故仔咁啱又係關於分析員。話說上市公司藍天威力(06828)剛剛舉辦個有關天然氣行業嘅論壇,目的係促進市場對天然氣行業嘅認識,同時亦希望市場可以對公司加深認識同關注,吸引更多機構投資者入股投資。

公司搞活動,當然唔想得小貓三四隻到場咁難睇,所以藍天威力搞呢個論壇,唔單止請咗燃氣行業豐富經驗嘅老行尊兼現任中國城市燃氣協會秘書長, 同埋內地天然氣行業資深分析師,阿Man一睇本場刊,見到「張化橋」呢個響噹噹嘅名字,就知呢個論壇必定高朋滿座,大把捧場客。

別樹一幟快上位

對於唔少資歷冇咁深嘅分析員嚟講,張化橋係一個偶像級嘅前輩,皆因張先生喺投行工作期間,先擔任中國研究部主管,其後更坐上中國投資銀行第二把交椅。威水史仲包括喺2001年至2005年期間,連續5年被《機構投資者》雜誌評為「最佳中國分析師」。之後出任上市公司深控(00604)嘅CEO,目前為中國支付通公司董事長。

張先生能夠成功由一個分析員蛻變為一間公司嘅話事人,係唔少分析員夢寐以求嘅事。阿Man收到風,論壇當日果然勁多慕名而來嘅分析員,喺論壇完結之後向張先生取經,即使未能好似張化橋咁勁,若能學得一招半式,為求喺風雨飄搖之際成功自保,能夠幸免於裁員風暴。

老友亦有份向張先生偷師,其中一個成功要訣,就係寫report要夠出位,咪人做自己又做。例如好似業績期,個個研究部都係同一時間出業績report,實在係難以突出個人本事。諗番轉頭,張化橋過往出報告,無論題材同報告出街時間都係別樹一幟,所以佢做分析員嗰期,係特別快出位同上位。

另一方面,張先生亦教路點去應付營業部,仲話做分析員都要有風骨,唔好吓吓聽晒營業部指指點點,為求做得成生意就跟風出一啲浪費自己時間嘅報告。若然要鬥得贏營業部,咪最好寫得出一份自己爭取到生意嘅報告,咁就唔再需要聽營業部支笛。

唔少分析員都話收到張老師呢啲貼士,真係獲益良多,其實今次論壇能夠邀請到猛人出席,真係全靠北京燃氣呢個牌頭,可見轉型兼泊咗個大碼頭嘅藍天威力,今時今日實力確係強得多。

麥狄文(徐狄怡.證監會持牌人)

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads