熱門:

2016年10月13日

方卓如 方如玉帥

鬥識人多唔多

恒指昨日跌142點,主板成交683億元。據報金融行業將來會被人工智能取代,如果市場日日都好似過去一個月窄幅上上落落,呢份工的確唔適合人類參與,只有唔怕悶嘅機械人先可以頂得順。人工智能唔單止用於高頻交易,捕捉市場一閃即逝嘅差價,連分析公司基本因素都已經由電腦做埋,唔需要人類做判斷。咁搞法,人類最大嘅功能,只剩下收風,收取機械人唔會知道嘅非公開資料。亦即係話,人類除咗做春江鴨,冇乜辦法叻過機械人。如果係咁,將來金融行業唔使鬥你叻唔叻,只係鬥你識人多唔多。

立法會淨係宣誓同選主席都搞咗成日,嚟緊4年都唔知可以有乜作為。立法會議員唔係用嚟立法已經係社會共識,但係用立法會做舞台去做政治行動都要有啲質素,否則達唔到效果之餘,亦會令邊緣支持者死心,唔肯再排隊投票。用幾個月時間爭取支持贏出選舉唔難,但係要用4年時間去保持支持就好難,白頭議員係一個最好示範,第一日嘅表現就幾乎決定佢下屆唔使再選。建制議員嘅支持係鐵嘅,非建制議員嘅支持係流水,唔想做一屆就拜拜,未來4年半分不可鬆懈。

《金融時報》長期有英國脫歐專題,近日熱點係英國「硬脫歐」與英鎊急跌。英鎊急挫並持續下跌,代表市場覺得英國資產唔值錢。的確,英鎊下滑,上至投資者下至消費者,都變得有興趣到英國購物。一個地方嘅資產價格如果唔跌,惟有呢個地方嘅滙率下跌,咁先可以反映呢個地方嘅資產在世界上嘅真正價值。英國樓價跌兼滙價挫,資產全面貶值。相反,香港樓價升滙價又升,咁咪即係香港資產值錢過英國嘅愈嚟愈多?

香港嘅滙率一定係跟隨美國「被升值」,用得最多嘅外幣係人民幣卻不斷地貶值。究竟香港嘅資產係會被內地資金逃出來保值掃高,還是被內地資金趁高沽貨套現調回內地救亡?睇人睇時間而定,唔係教科書式一句到尾咁簡單。但可以肯定,冇理由香港可以強悍到資產價格同滙價同時間持續上升,高沽低買是常識吧,分別只係邊個沽同邊個買。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads