2016年9月2日
「方帥,放低你件玩具先啦,星期日選舉,講幾句吖。」
「草蜢仔,你記住去投票,雖然好多人幾乎心死,但心死人未死,你仲喺呢處地方生活,有人肯跑出嚟做你不屑做嘅事情,點都要去畀張票佢,送佢一程。」
「但係今年特別多妖魔鬼怪,又多離譜恐怖事情,正常人都已經憤怒到變成麻木,麻木到就連行去票站都唔想。」
公務員不獲信任最傷
「其實今屆最傷嘅係,連最後防線公務員都俾人覺得靠唔住,咁先係最玩殘香港。你去第二啲地方,你可能會有介心,政府嘅人未必係對你好,係會害你嗰個。例如坦桑尼亞,你喺馬路上遇到警察,你會驚,因為佢會截停你,要你畀錢放行。香港,40年來你從來唔會覺得打政府工嘅人會害你。而家?連4年一次出現嘅選舉主任,你都信唔過,覺得佢係受人差使,會做啲害人嘅事情。呢樣嘢仲恐怖過見到啲候選人電視辯論。當公務員都令人信唔過,兩條支撐香港『一國兩制』嘅大柱就崩咗一條,只剩下法官判案,如果都可以受人指使,咁香港就全面崩盤。」
「唔使講到咁遠喇方帥,投票有乜心水呀?唔好嘥咗我張票呀。」
「好簡單啫,你知道邊啲人唔投得咪得囉!契弟一定唔投得,你仲嫌而家社會唔夠多契弟?仲要每個月送十幾皮畀佢使?你點對得住你老豆老母?冇犧牲過嘅,唔投得。立法會唔係做嘢嘅、廢嘅,已經係市場共識,你唔使揀人入去做嘢。反而,為你為社會犧牲過嘅,你應該畀張票佢,送佢入去,等佢有個舞台,唔好畀佢默默地在社會沉淪中年華老去。趨炎附勢嘅人已經太多,做人應該憐憫弱小,周身傷痕嘅,最應該送佢入去立法會呢個瘋人院休養,起碼有眾多院友相陪。」
「話時話,你係會計界㗎喎,你又會支持邊個?」
「Kenneth。講完。」
註:會計界候選人包括梁繼昌及陳弘毅
訂戶登入