熱門:

2016年8月31日

麥狄文 金融街密語

定過抬油做多屆

今屆「垃圾會」選情比起歷屆更為激烈同複雜, 加上政府拒絕多名打港獨旗號人士,又或者唔like《基本法》人士參選,搞到選舉事務主任收到恐嚇,阿Man認為今次選舉爆發突發事件嘅不明朗因素大大增加。仲有幾日就係投票日,聽聞警察部門嚴陣以待,防止有人衝擊生事。

「垃圾會」戰況激烈,呢股風亦吹到功能組別呢邊,阿Man講緊嘅當然係金融圈關心嘅金融服務界。表面上今屆候選人少過上一屆,由5個減到3個,不過最後一刻先決定參選嘅詹叔公子崙少,同埋另一個候選人證券業協會「阿徐」,講到明出嚟選係因為唔妥現任議員「飯局峰」。

過往一直係「垃圾會」台柱嘅詹叔,除咗自己中風之後仍然出戰地區直選,成為港島區候選人之外,公子崙少喺參選報名截止前趕尾班車,當時被指對參選無誠意。

其實崙少報名之時,出現甚多甩轆事件,報名之際連參選政綱亦未準備,出戰參選純因為唔妥現任「飯局峰」,認為佢既無十足諮詢業界,亦無為業界謀利益。崙少為表誠意,表示當選後計劃做全職議員,講笑唔介意搵少啲。

至於證券業協會副主席「阿徐」,就話咁多年嚟,尤其係過去四年,在任議員甚少提出議案以幫助業界,包括證券或金銀業貿易。

而事實上,冇提及議案並非反映業界冇問題, 若然讀者同阿Man一樣係從業員,就會明白究竟業界有乜問題。

被兩名候選人擺明車馬挑戰,「飯局峰」似乎定過抬油,皆因阿Man收到風,一直無個人票嘅金融服務界別,「飯局峰」連任呼聲甚高。

而掛住證券業協會副主席呢個銜頭嘅「阿徐」, 反而「被劃清界線」,證券業協會擺明唔撐。再講埋詹公子崙少,喺參選最後一刻彈出嚟,已令唔少同業摸不着頭腦,有人話係詹叔怕自己唔夠健康撐到選舉,都有囝囝出嚟爭番個議席。不過詹叔家陣自己參選,都唔顧得仔仔咁多,冇乜時間喺業界為阿仔拉票。

睇嚟「飯局峰」好大機會再度連任,做足三屆金融服務界嘅議員。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads