熱門:

2016年8月12日

方卓如 方如玉帥

使出洪荒之力

「方帥,『深港通』有眉目,我哋呢鋪發達喇,想窮都難。」

「咁唔該你就勤力啲,唔好晚晚走去Arena扔乒乓波,諗計賺多幾個錢。你最衰係投胎做咗香港人個仔,老豆唔係上帝。上帝就話可以叫人跪低同你道歉,香港人就弊在連直播都少過人。講真,香港隊都有啲係鬼妹仔,可以話畀人知我哋係國際都市,隊中可以有唔同血脈嘅人。換咗係上帝之國,你連讚吓鬼佬嘅自由都冇,會俾人鬧。香港有水流入嚟,唔代表香港人有能力接得住。等於倪家駿游水攞牌,就算佢係半個香港人都唔好以為入香港數。都係嗰句,香港唔會死,但香港人會死。」

「深港通」大陸人玩晒

「唔係啩,我做呢行,可以斗零都冇得入我袋?條數點計呀方帥?」

「都話你仲睇唔穿,淨係識睇啲宣傳文稿,搞到沖昏頭腦,以為香港前景無限等於香港人有運行。『深港通』,深水可以買港股,首先大陸券商賺咗先。大陸人買股票,首選買啲高回報嘅當炒股。大陸人賭性咁強,啲錢來得快去得快,生死有命阿彌陀佛,梗係短時間衝入嚟搵大錢。不過,『港股通』失去了買港股最大嘅用處,就係可以泊啲錢喺香港,唔好旨意突然間香港會水浸。有水,都會買番啲大陸老細嘅公司。佢哋喺深圳講好晒有乜着數,唔通佢哋會喺深圳做功課買香港人公司價值投資?大陸錢經大陸券商買大陸公司,香港人冇位置發力。即使你使出洪荒之力,冇位,就算你隻手天生夠長都掂唔到啲錢。」

「方帥,所以話你唔識嘢。我哋係新世界代表, 係而家嘅King,梗係全部都同大陸券商行埋,同大陸人一齊玩,仲幫大陸公司賣貨啦。我哋睇奧運都係睇國家隊舉鐵,唔使睇香港六呎男神打劍嘅。我哋咁醒目,一定有運行。」

「叻仔,唔怪得你未開張就做一億生意,記得睇住細佬。」

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads