熱門:

2016年8月3日

麥狄文 金融街密語

又係七個蓋十個樽出事

港股今年未有經歷五窮六絕嘅困境,7月仍然例牌可翻生,整個7月份港股升咗超過5%,但去到7月底,細價股竟然嚟咗場股災。有人歸咎於沽空機構又攪屎棍,因為Glaucus出手,重創德普科技(03823),引發今次細價股股災。阿Man就認為係有人太貪心,同一時間坐住太多細價股,左借孖展,右借財務,七個蓋冚十個樽,先引嚟火燒連環船式細價股股災。

話說有個活躍於投資港股嘅富二代,暫且稱呢位富二代為N君,近呢六七年開始對二三線股仔興趣漸濃,尤其係啲有潛力殼股,唔理係主板定係創業板,都買咗先算。呢位N君由最初自己儲吓貨,到後來認識到唔少股仔莊家,索性大手投資,一於同班莊家齊齊拍住上。

舊年港股「大時代」,呢位N君當然撈到風生水起,但隨住「大時代」過去,兼出現二三線股仔跳崖式股災,N君除咗要求友好證券行加大孖展額度,亦要搵財仔幫手度水,先捱得過舊年嘅斬倉潮。以為受過上年嘅教訓,有人會收斂啲,至少唔會同時坐住太多貨,偏偏有人冇有怕,仲諗住咁易過到骨,繼續玩落去,兼且玩大佢。

當中N君持貨唔少嘅德普科技,早喺沽空機構出手前,坊間已有唔少股評人或分析員指出此股為問題高危股,出事係遲早問題。偏偏N君一於少理,仲認為德普終有一日龍穿鳳,透過收購可成大器,實行坐重貨。

股價暴跌仍未停牌

可惜上周Glaucus出擊,指控德普以超高價收購4家倒閉中或只有微利的公司,然後誇大盈利。雖然德普當日已發澄清通告反駁,但股價仍然插水九成,市值單日蒸發超過100億元。德普插水,N君當然被call孖展,一時三刻班唔倒水,惟有被斬倉,證券行斬倉話之你,戶口裏頭有乜股就打乜股。據聞當日跌幅超過三成嘅細價股,幾乎N君都有持貨,其中3隻大瀉八成股份,好似工蓋(01421)、中國天化工(00362)同鼎石資本(08097),都係N君持重貨嘅細價股。

而當日有缸邊友奇怪,點解德普跌成咁都唔拉閘停牌,雖然監管機構可能已施壓叫公司主動停牌,但見過唔少「一停不復」嘅例子,知道停牌容易復牌難。唔少老闆寧願市值單日蒸發七八九成,亦不想被長期停牌變相喪失埋上市地位。

對於無做孖展嘅股東嚟講,唔停牌,股價狂瀉仲可攞番部分本金,長期停牌有機會連渣都冇,所以監管機構亦唔會隨便勒令關注公司停牌,免得被投資者投訴剝削其沽貨脫險嘅權利。

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads