2016年7月20日
法國自從經過多次恐襲,政府正式同國民宣布,我哋要同恐襲共存。
和打仗唔同,永遠唔會有一個戰勝日,冇話終有一天敵人宣布投降。恒久的戰爭,戰場喺正自己屋企,你話法國人喺咪慘到爆?尼斯恐襲地方原本係成個城市最疏肝嘅地方,以後有乜喜慶活動都唔敢再去嗰度。
恐襲徹底改變了法國人的生活方式,細微至大學依家係唔畀學生旁聽,冇報名唔畀上堂,共存唔係得把口講。
同樣地,我哋都係永遠要同金融危機共存,大爆煲嘅一日始終會嚟,但冇人知幾時。最有錢同最窮嘅人都唔使擔心爆煲,只係你呢啲借咗錢買樓,而且每個月使剩少少嘅,仲要學人走去睇份財經報紙去投資嘅,先至最驚青。你只要學識共存就冇事,唔好亂使錢,留番啲現金做糧餉,真係現金嗰隻,銀行存款都唔安全。最重要係減債,欠過債嘅人就知,財務自由首要唔係搵好多,係要冇負債,冇負債你就可以輕鬆達致財務自由。
財務自由首要無負債
依家比廿年前更加容易,社會已經唔再係物質主義(大陸除外),生活崇尚嘅唔再係周身名牌,而係自然環保永續嘅生活態度。你有壓力要同人鬥,生活簡單,自然容易財務自由。只不過依家奢華嘅生活,由過往自身嘅名牌過檔到子女嘅投資。有仔女嘅就等於有個無底深潭,唔到你慳,幾難可以財務自由。
結論係,你睇緊財經報紙,讀到呢一段,諗起自己層樓仲有10年未供完,最近行過地產舖見到樓價又跌咗,細路仔下個禮拜上機去遊學團,銀行份工最近又唔係幾穩陣,之前買落嘅一啲賣殼股,最近又唔係幾郁,電話WhatsApp響起,你兩個月前識嘅女朋友想買個新嘅Lindy手袋。你背脊一股涼氣直竄上來,深明要同危機共存好耐。
訂戶登入