熱門:

2016年5月4日

方卓如 方如玉帥

千古IQ題

李斯特城真係贏到英超冠軍,唔係佢勁,係對手渣啫。佢哋贏英超嘅分數比近5屆都要低,緊隨其後嘅係熱刺而唔係傳統勁旅,證明係咁啱得咁橋,隊隊名牌今年都走樣,時來運到,俾撞正有幾個當Fit球員嘅李斯特城可以偷到雞。

如果單憑李斯特城好波而唔係勁旅走樣,最多只係俾佢哋主客都可以殺低勁旅,贏足6分,斷唔會係而家只係得呢支冠軍隊有機會過80分。結論係,有時唔需要你叻;人哋差,夠運,你同樣可以跑出。

Valeant唔道德?

李斯特城將會永遠成為佳話,運動比賽唔會再有什麼不可能。同樣成為佳話,喺畢非德股東會上有人問到,可口可樂咁唔健康,害人子女,你又投資?問題嘅來源係因為股神班底話Valeant唔道德,唔應該投資,惹嚟投資咗嘅對沖基金反駁。Valeant點唔道德?

佢哋收購完藥廠然後大幅加價,引嚟社會喊打喊殺。應否投資不道德公司,成為股神股東會後嘅話題。

呢條係千古IQ題,三日唔埋兩日就有人問,上市公司係咪要為股東賺盡?賺錢係咪唯一任務?賺錢之餘仲有冇社會責任?

掛菩薩面具行兇

社會責任嘅成本應唔應該由股東孭?呢啲IQ題,從來冇人有本事走出嚟一錘定音,講到一個冇得駁嘅答案,間唔中又有人斬件式攞出嚟講,最後都係維持IQ題狀態,毫無寸進。

我IQ爆棚(有國際認可資格認證,冇吹水),高到唔會降低自己IQ去答呢條IQ題。只係講一句,最唔道德嘅公司係擺出嚟個款道德但係手法唔道德,呢類公司掛個菩薩面具行兇,先至人神共憤。可口可樂,佢係令人唔健康嘅糖水,個個都知。你肯飲,冇人逼你,夠晒道德。賣藥,靠佢救命,而家開天索價,唔算道德。開宗明義,同暗渡陳倉,應該睇得出分別。

香港有冇呢類公司?明天再講。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads