2016年4月13日
相信好多人好耐冇睇NBA,自從Michael Jordan收山,NBA冇咗明星,收視率節節下降。雖然佢收山之後,NBA想捧人接班,Kobe、James,但係兩個都係MJ翻版,你係唔會對山寨有同樣追捧熱情。
Warriors出現之後,NBA翻生。Stephen Curry係同MJ完全唔同款嘅明星,專向難度挑戰。遠射、帶波、傳球,場場都係花式表現,睇到嘩嘩聲。星期四早上破埋公牛紀錄,呢隊波就係現代嘅經典,你親眼目睹歷史嘅發生。全靠Warriors,好多人重拾追睇NBA嘅樂趣。
冇明星冇亮點
呢個世界所有嘢都一樣,要靠啲明星嚟帶起人類嘅注意力。球賽一定係,股票都係。而家你覺得市況死氣沉沉,唔係因為大市橫行,係因為冇明星,冇亮點。橫行係結果,唔係原因。上年大時代係MJ,個個都爭住追看,所以市旺到不得了。今年連翻版MJ都冇,莫說Curry。缺乏明星,你連睇股票都冇興趣。
同NBA唔同,NBA明星可遇不可求。MJ同Curry相隔20年,如果股票明星要等二十年一鑊,你都已經瓜柴,唔使旨意退休。股票明星,隔幾年一次,總有亮點畀你去發掘。有股票明星,就好似Curry帶旺成隊波,連啲唔起眼嘅後備球員都顯得特別醒神,豬扒都變美女。你諗番去年呢個時候,你是否買咗好多豬扒?
今年已經過了三分一,要愁嘅已經愁到夠皮。我講過,好多人靠股市搵食,更加多人投資嘅工具只有股票,而且由細到大畀人洗腦,唔投資過唔到世。正因如此,股市明星三兩年就被迫橫空出世,由人類催生。
要解釋點解經濟講到咁差,全世界政府都周身債,個個都鬥印銀紙,何解股市非但冇一沉到底,反而蠢蠢欲動,向從前高位進發。
你諗唔明,睇吓NBA,會有啟示。
訂戶登入
下一篇: | 道指國指危殆 托高恒指散貨 |
上一篇: | 滬港通上日收市統計 |