熱門:

2016年3月14日

高仁 財圈識真假

孖展融資套現大法

各位「巴打」是否記得,在港產片《無間道》裏面,警方臥底陳永仁(梁朝偉飾)「3年又3年,3年之後又3年」的經典對白嗎?現實生活中,恒發洋參(00911)大股東「陳永仁」(不好意思,應該是楊永仁才對!)未夠3年就擬以每股1仙賣盤(請閱2月29日〈洋參「仙」生真假賣盤〉),可見一個3年都不容易捱,何況3個3年。

「高仁指點」話你知,有一些上市公司大股東的孖展融資,被迫斬倉搞到「一鑊粥」,其實有機會避免。雖然有時候大股東抵押股票融資套取現金會都有限制,但高仁與「豬朋狗友」卻有破解相關限制的大法。

在披露對話實錄之前,請各位「巴打」與「絲打」重溫人物背景,簡介如下:

大股東抵押股票方法多

戴孤劃─又稱為「戴Sir」,《信報》「蠱壇辨虛實」專欄作家,上市公司大股東,經常欺壓小股東;

程更計─本地證券行經紀兼財務顧問,除了招呼散戶之外,亦向上市公司出謀獻計;

李至成─「大孖沙」律師行合夥人之一,最「叻」教導客戶遊走法律灰色地帶。

高 仁:據玲玲師傅話,2016年係丙申火猴年,火猴年係咪咁惹火,我就唔知嘞。但係,我覺得呢隻馬騮仔零舍百厭,未過年已經搞到部分細價股「立立亂」咁。

程更計:你係咪講緊之前嘅城中熱話呀?「洋參『仙』生」懷疑孖展被斬倉,股價走勢勁過坐過山車,約莫一個鐘就暴跌91巴仙,之後仲盛傳有人想借勢搶殼?

戴孤劃:咦!呢隻股票,市場之前吹到好大喎。我上大陸嗰陣時,周不時聽到有人討論,仲有唔少內地基金坐貨。唉!做股票呢一行,如果唔啱時勢嘅話,吹得大,就死得快。

程更計:鬼咩!計我話,中國人好多事情都唔齊心, 但斬起倉上嚟就最齊心,股價要跌幾多有幾多。但呢間公司話晒曾經都有超過200億元市值,算係「生得偉大、死得光榮」啦。

高 仁:阿程,人哋都未死,你唔好激動啦!香港係一個多元嘅社會,不同嘅股票,都會有不同嘅投資者(及券商),與人無尤。

戴孤劃:(用普通話)對呀!這樣激動幹嗎?

高 仁:(心想,真係頂戴Sir唔順)講開又講,大家知唔知道,大股東要抵押股票做融資,可以有好多種唔同嘅方法?

李至成:我知其中一個方法係,大股東可以把股票抵押畀私人銀行或某些券商,但因為某些限制嘅緣故,大股東唔可以直接拎錢走,只可以把錢投資喺其他股票度,咁樣融資成本很低,總成本可以低至2%至3%。

戴孤劃:但係,大股東都攞唔X到錢走,有X用(高仁按:繼阿程之後,戴Sir心情煩躁,憤然爆粗)?

高 仁:戴Sir,唔使勞氣,阿程做經紀兼財務顧問,一定有方法解決。係咪?

交叉持股易燒連環船

程更計:(突然冷靜落嚟,好似好專業咁)係呀!戴Sir可以把筆錢買咗股票先,再把該批股票轉倉去其他證券行,咪可以順利cash out囉。另外,戴Sir又可以搵「友好」交叉持股【圖】,你買我公司不超過5%股權,我又買你公司不多於5%股權,又毋須披露持股。

李至成:不過,我要提醒大家一句,小心火燒連環船呀。之前突然爆煲嗰隻股票,同另一家公司簽咗戰略合作協議,據聞兩家公司被券商「巴打」懷疑交叉持股,所以第一隻股票爆完之後,另一隻股票咪跟住爆囉。

戴孤劃:咁仲有冇其他方法呢?

高 仁:戴Sir唔使心急,我哋會繼續慢慢講。

(飯局未完,下周待續。)

本欄逢周一刊出

歡迎交流上市公司的財技個案及招數,請電郵至 [email protected]

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads