熱門:

2016年2月22日

方卓如 方如玉帥

經濟定律可以唔表現出嚟

睇淡人民幣嘅對沖基金,唔係空口講白話。Kyle Bass瞓晒身沽空人民幣,用咗12版紙去講點解佢咁夠薑,實牙實齒賭身家。其實講來講去好簡單,呢個世界自從有咗信貸呢味興奮劑,經濟就有起跌循環,有繁榮有衰退。信貸膨脹,經濟自然好似加咗火水一樣旺盛;到要還錢,信貸開始收縮,經濟就好似你去wet完之後,謝謝哋,冇神冇氣。周而復始,泡沫、爆破、再嚟泡沫。財富不斷轉移,不斷集中,世界上一半財富在1%人口手中,呢啲全部都係信貸帶嚟嘅結果。如果呢個世界冇咗信貸,你賺幾多食幾多,邊有可能創造咁多財富,邊可以有咁快速嘅經濟增長。

對沖基金唔係同中國過唔去,要沽空你對付你, 而係全世界都要跟隨經濟定律運行的話,10年間內地銀行資產增長10倍,去到34萬億美金,等於全國GDP嘅3倍幾,冇可能可以無限地擴張。銀行收水已經會令經濟收縮,再加上收唔番嘅爛賬,內地銀行要等住國家打救。任何一個打救銀行同挽救經濟嘅方法,都會令到人民幣貶值。除非中國有本事可以違反經濟定律而行,否則人民幣貶值只係時間問題。Bass嘅Hayman基金,平晒所有倉,專攻人民幣貶值,就係要同你守足一年半載,唔信你可以無止境地頂下去。

內銀借錢睇政治能力

中國係咪可以違反經濟定律?可能唔得,但佢可以用好多方法令經濟定律無法表現出來。例如一個人可以唔見咗,不過佢可以寫到信,叫你唔使擔心,但欲言又止,搞到可愛嘅唐唐覺得係佢擠牙膏式向外披露,要苦口婆心叫佢自己出嚟澄清,係咪自己偷渡,做乜要藏頭露尾,唔大方地向港人交代,令到我哋亂估咁擔心。銀行拆借嘅對象,係國企。等於香港政府唔需要為高鐵超支包底,由佢持股七成半嘅港鐵(00066)包底就冇問題,大家可以放心。左手嘅銀行借畀右手嘅國企,還錢有問題,只要再借多啲,等我有錢還咗舊債,新債從頭計算,又係好賬一條。保守嘅銀行會係舊賬未清新賬免問,但內銀,連Kyle Bass都識講,放貸唔係講還款能力,係講政治能力。大家自己人借錢,點會唔還,點會係爛賬?信貸係可以無限擴張,銀行係可以唔爆煲,人民幣係可以冇貶值嘅基礎。

外滙儲備有限,頂唔到好耐?有冇聽過熊人追獵人嘅故事?兩個獵人逃命,獵人甲話走嚟做乜,你都唔夠熊人快,獵人乙話快過你咪得,唔使死。中國唔使頂到永遠,頂到歐洲日本或美國先爆,咁就冇事。對沖基金正經分析,我哋呢幾年被訓練到千祈唔好正經分析,否則自己吐血傷身,呢鋪我買阿爺贏。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads