2016年1月28日
索羅斯成為中國頭號敵人,文攻與銀彈,點鬥都要對抗佢沽空亞洲,關鍵唔係哪一邊大聲,而係哪一邊多人信。你有幾萬億外滙儲備係冇用嘅,唔通你夠膽用晒嚟同大鱷死過?
外滙儲備多少是公開數字,有報多冇報少,所以對付大鱷係你在明,但係大鱷可以動用幾多子彈冇人知,佢哋在暗。大鱷明知你有幾多子彈都同你開戰,計晒數,佢行先一着。
但係大鱷同國家加埋,點都唔夠民間富有。邊個可以鼓動民間資本跟隨自己,嗰邊就贏。數據可以呃人,但市場唔會呃人。市場上哪一邊多人跟,好快就知。要真正對付大鱷,只有將大多數人都變成國家隊,咁就可以實力深不見底,只係消滅咗民間嘅財富。其他國家冇咁嘅能耐,中國有冇?過去半年嘅實證顯示,唔肯定。
去到超級大鱷嘅級數,佢哋玩macro 同埋event driven,落注買嘅係國家政策錯誤同市場定價錯誤。
扭曲市場致有機可乘
1992年沽空英鎊,就係英鎊加入ERM定價過高,一沽就爆。而家亞洲貨幣對美元普遍貶值,將來美國有機會繼續加息,沽空亞洲是順理成章。貨幣貶值,增加競爭力,亞洲反而可以刺激經濟增長,到時貨幣又可以升值番。市場本應就係咁運作,唔俾佢反映到真正情況,大鱷先有機可乘。沒有錯價,市場反映晒現實,大鱷邊有本事搵食。
香港經濟靠近內地,貨幣貼實美元,兩面背馳,遲早五馬分屍。樓價泡沫爆破,貨幣高企,就係當年日本通縮開始嘅翻版。而家香港最值錢嘅就係銀紙,其他嘢都會愈嚟愈唔值錢。買人民幣可能會賺息蝕價,買香港資產都一樣會有賺yield蝕價嘅情況。通縮環境下,零息狀態都有正利率(實質)。你可以唔做大鱷,但家陣都要學大鱷睇嘢macro啲,留意所有events,唔係再去諗價值投資,發掘優質股票。
訂戶登入
下一篇: | 未平倉合約 續增有古怪 |
上一篇: | 滬港通上日收市統計 |