熱門:

2016年1月27日

方卓如 方如玉帥

國家有至強武器

恒指由高位二萬八點跌落一萬八點,假假地都唔見咗一萬點,冇咗三分一。雷曼倒閉、信貸市場冰封、金融海嘯,都係由三萬點跌落一萬點,唔見三分之二。但係今日比7年前銀紙印多咗又見使咗,槓桿亦比7年前少得多,普遍人嘅抗逆能力亦進步過7年前。前所未見嘅金融危機都見過,今次要壞得過7年前,除非有一個重要經濟大國宣布唔還錢,貨幣大貶值,資產價格狂冧,咁先至會有暴力過7年前嘅大屠殺。唯一有咁大殺傷力嘅,只係中國同美國。美國唔會,因為佢係全世界貨幣嘅信心支柱,叫得支柱就有全世界支持,佢同亞視都係一樣咁硬淨,唔使驚。

唔係美國,只有中國有咁嘅本事。不過,國家級最強嘅武器,同對付大鱷嘅架生都係一樣,分別係銀紙同手段。3萬幾億美金外滙儲備,人均數值其實只有兩千美金,但係手段一定係全世界最強最到位。

2016年要睇住政府

外滙儲備3萬億美金,但係可動用嘅民間資源真係不計其數,必要時全民都可以變成國家隊,別國常用嘅外滙管制都只係小兒科。用錢去影響市場仲有路捉,但係用手段去狎玩市場就超乎想像,所以大鱷企圖沽空中國謀利是找死。

有咁強嘅武器先至得人驚,中國用了半年時間話畀全世界人知,佢哋嘅財金系統人員沒有熟悉市場嘅專家存在,或者熟悉市場操作嘅專家不在權力核心,有助市場嘅事情過去半年一件都冇,反而愈睇愈驚,愈做愈露底。中國會唔會喺2016年,做一兩件為咗穩定市場嘅事反而推冧市場?當年美國政府唔救雷曼,除咗係唔敢救,亦都係因為唔知會咁大鑊。人係冇預知能力,但係有能力汲取教訓。金融機構經過7年整頓,唔再係殺傷市場嘅禍患,但係政府孭咗7年嘅包袱,入面裝咗咁多放射性毒物,怕佢一時唔小心,打瀉,搞到一地都係。

2016年,唔係要睇住個市, 係睇住政府。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads