2016年1月13日
呢期大家茶餘飯後講得最多嘅話題,一定係震撼全港嘅「被失蹤」事件,演變成後來「用自己方法」返內地,甚至有「洗頭艇」呢種先進回國交通工具,令阿Man深深相信做到老,學到老,每日都學到新事物。
其實金融圈近日亦有神秘失蹤事件,主角係過去2年活躍於新股上市,又或批股發債等企業融資活動嘅「大鵰兄」。呢位仁兄自從幾年前離開「銀河基金」之後,喺企業融資領域上發展一日千里,涉獵大大小小嘅deal數以十單甚至過百單計,被行家冠以「鵰王之王」,更有熟稔行家專稱佢為「大鵰兄」。
奇怪係呢2個月喺大量新股上市期間,「大鵰兄」反而無晒影,未見佢喺任何上市儀式浦頭,鵰王之王竟然無刁做,難怪行家打探其下落,更推測其跟老闆意見有出入,呢期「被消失」。雖然阿Man同「大鵰兄」未算太熟,但一直亦有個人聯繫,見其微信透露其行蹤,只係「大鵰兄」呢期專注玩其所好,所以近日只係偶爾返寫字樓處理事務,其餘時間遊山玩水之餘,兼作風轉得低調,唔多參與任何大大小小deal,致令大家誤會其得罪老闆所以「被失蹤」。阿Man就唔多覺「大鵰兄」同佢老闆有乜爭拗,不過聽聞「大鵰兄」另有老闆垂青,想搵佢過檔,估計因此變得低調亦唔出奇。
「國泰民安」班大哥頂上
「大鵰兄」隨時將鵰王寶座讓出,而呢期最有潛質坐上此寶座者,非「國泰民安」企業融資部幾個精英莫屬。皆因集團呢期保薦嘅新股中國宇天(08230)同承達集團(01568),上月趕年底尾班車上市都有好成績。前者全配售上市,股價上市後升1倍係常識吧,至於後者現價亦較招股價升逾三成。
去年年尾埋咗個靚年結,今年年初亦交到成績,尋日上市嘅巨匠(01459)上市首日逆市上升,股價已較招股價勁升近四成,如此市況有此成績,等於幫今年嚟緊嘅招股活動打咗支強心針。聽聞今年「國泰民安」接咗唔少大deal,既然「大鵰兄」玩低調,鵰王隨時輪到「國泰民安」班大哥。
訂戶登入