熱門:

2016年1月4日

高仁 財圈識真假

「唉賓」穿西裝的大學問

新年新景象,人人都鍾意買返件新衫,換返一個新Look示人。其實,投行對「唉賓」freshman的Look或禮儀也相當講究,甚至有專門課程教授選購及穿着西裝的學問。

在披露對話實錄之前,請各位「巴打」與「絲打」重溫人物背景,簡介如下:

戴孤劃──又稱為「戴Sir」,《信報》「蠱壇辨虛實」專欄作家,上市公司大股東,經常欺壓小股東;

程更計──本地證券行經紀兼財務顧問,除了招呼散戶之外,亦向上市公司出謀獻計。

高 仁: 唔好意思,遲咗少少。大家Happy New Year!

黑灰藍色最穩陣

戴孤劃: 咦!高仁新一年又有新西裝出場喎。

高 仁: 其實,我幾乎每年都會添置新西裝,因為「唉賓」着一套good fit嘅西裝,可以畀到客戶zx一個professional嘅形象,「毛巾」甚至會開班教「唉賓」點樣着西裝𠻹。

戴孤劃: 「唉賓」又係professional,會計又係professional,但點解沈繼司着西裝,會無你咁型嘅呢?

高 仁: 每一個人高矮肥瘦都唔同,要喺shop買到一套good fit嘅西裝,基本上是mission impossible。我估計,沈繼司可能係買咗「現成」,咪冇咁good fit囉。最好方法一定係自己搵裁縫師傅度身訂造西裝。

程更計: 咁「唉賓」訂造西裝會揀乜嘢顏色呢?

高 仁: 「毛巾」建議基本顏色選擇只有黑色、灰色和藍色的3種顏色,因為呢3種顏色係最安全、最穩陣兼最能夠襯托出「唉賓」成熟魅力嘅色調。

戴孤劃: 唉!我見沈繼司西裝外套個膊頭好闊,而領位又幾乎唔見咗件恤衫,好似偷咗人啲衫嚟着咁。

高 仁: 哈哈!佢係咪錯誤理解咗「做男人要有膊頭」嘅含意,以為自己膊頭好橫夠「承擔」,選擇咗膊頭位過大嘅外套?其實,西裝膊頭位應該愈稱身愈好,或者可以較實際短2至3厘米【圖1】。西裝外套嘅領位則不宜太高,恤衫領位要較外套領位高出約1寸【圖2】,先至係合適嘅高度。

程更計: 點止呀,我都見沈繼司西裝外套手袖長到乜咁呀。

高 仁: 外套手袖嘅長度不應過長或過短,外套袖口同手掌應該有1至1.5寸嘅空間,而恤衫袖口就要較外套袖口長1厘米【圖3】,咁就係perfect嘞。

戴孤劃: 我硬係覺得佢着嘅西裝好老套,點解呢?

高 仁: 嗯……我諗係外套嘅翻領出事,佢一定係揀咗闊翻領。以現時21世紀嘅標準,翻領愈窄愈trendy;相反,翻領愈闊愈老土。順帶一提,領呔嘅闊度應該與外套翻領闊度一致。

程更計: 高仁,你都知道西裝外套有2粒同3粒鈕扣嘅款式,咁「唉賓」會點樣揀?

高 仁: 其實,兩種款式都冇所謂,但無論任何時間都應該將第一粒鈕扣扣上,而最後一粒鈕扣就永遠都唔好扣上。如果「唉賓」係着3鈕扣嘅西裝做presentation或出席公開場合時,就一定要扣上第二粒鈕扣;相反,如果「唉賓」坐低嘅時候,就一定要解開所有鈕扣,否則可能會扯斷鈕扣。

戴孤劃: 我好鍾意將手插入褲袋喎,西裝外套又應該點揀呢?

高 仁: 一般嚟講,西裝外套有單開叉同雙開叉設計,主要就係為咗預留活動時空間嘅剪裁。既然戴Sir要「型到爆」經常將手插入褲袋嘅話,我就建議你揀雙開叉設計,因為會比較好睇。

程更計: 啊!原來「唉賓」着西裝真係有咁大學問,等我聽日都去買返一套good fit嘅西裝去傾「刁」(deal),我相信一定會事半功倍。

高 仁: 好!預祝你成功。Cheers!

本欄逢周一刊出。

歡迎交流上市公司的財技個案及招數,請電郵至[email protected]

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads