熱門:

2015年12月28日

高仁 財圈識真假

環保「殼」與循環「肉」財技

政府推行三色回收箱的環保政策,已經有十幾至二十多年時間。其宣傳口號是「藍廢紙、黃鋁罐、啡膠樽」,只要做好分類回收的環保工作,廢物就可以循環再用。但又藍、又黃、又啡,市民是否分得清楚呢?

其實,各位「巴打」要領略環保循環再用的好處,何須要記住什麼顏色這麼麻煩?「高仁指點」話你知,高仁與「豬朋狗友」戴孤劃及程更計通過出席一場婚宴,就可以學懂環保「殼」與循環「肉」的財技了。

在披露對話實錄之前,請各位「巴打」與「絲打」重溫人物背景,簡介如下:

戴孤劃──又稱為「戴Sir」,《信報》「蠱壇辨虛實」專欄作家,上市公司大股東,經常欺壓小股東;

程更計──本地證券行經紀兼財務顧問,除了招呼散戶外,亦向上市公司出謀獻計。

程更計:哈哈!今次真係有咁啱得咁橋,大家出席埋同一個婚宴,仲要喺五星級大酒店度飲。

高 仁:因為,我哋都識同一位上市公司嘅主席兼大股東陳總嘛。

戴孤劃:唏!陳總份人有錢又豪爽,嫁女咁大件事,點可以寒寒酸酸,梗係喺五星級度擺啦。

程更計:咁又係。驟眼睇,呢度最少都有三四十席,真係名副其實嘅大排筵席。

高 仁:簡單計算,陳總今晚淨係收「人情」條數,都有可能超過七位數字。

戴孤劃:有付出自然有收穫,我哋畀咗份咁厚嘅「人情」,一定會有好嘢食嘅。

程更計:(侍應完成分菜,剛好上菜中)咁呢個dish係乜名堂?

高 仁:阿程,你咁都唔知?你唔好成日掛住做嘢,要多啲出嚟同我哋食飯至得。

隻「殼」可不斷轉手

戴孤劃:呢個咪係八寶釀焗大響螺。

程更計:I see。

(各人享用完畢之後,侍應收回碟子及刀叉,但螺殼沒有放進廚餘箱內。)

程更計:(輕聲細語)高仁、戴Sir,你哋有冇見到呀,個侍應冇將啲螺殼攞去丟,仲放埋喺一邊喎。

戴孤劃:阿程,你真係見得世面少,喺度大驚小怪。

高 仁:咪係,啲殼會攞嚟回收循環再用嘛!

程更計:Really?

戴孤劃:佢哋嘅做法同上市公司大股東一樣啫。

高 仁:公司在港交所嘅上市地位就係「殼」,公司本身從事的原有業務係「肉」,大股東可以按照新買家嘅喜好去「烹調」。

程更計喜好?乜嘢喜好?

戴孤劃:如果買家鍾意「原汁原味」嘅話,大股東就可以「殼」連「肉」一齊「煑」,成間公司賣俾對方。

高 仁:如果買家淨係鍾意隻「殼」嘅話,大股東就要將隻「殼」經過特別「烹調」處理,先將啲「肉」剝離咗,之後再賣隻「殼」畀對方,造成「殼」與「肉」分離。

戴孤劃:因此,上市公司隻「殼」可以不斷轉手,總之就係相當環保。

公司業務循環再上市

程更計:原來係咁,咁都冇乜特別啫。

戴孤劃:唔夠特別!?高仁,醒啲再特別嘅過佢。

高 仁:阿程,咁啲「肉」可以循環再用,你聽過未?

程更計:(想起剛剛吃的八寶釀焗大響螺,立刻感到嘔心)莫非頭先食嘅螺肉係……

戴孤劃:唔使擔心,我哋係喺五星級大酒店度飲,唔會有你所諗嘅情況。

高 仁:我講嘅「肉」可以循環再用,係原大股東先將公司整體上市,隻「殼」經過特別「烹調」處理,將啲「肉」剝離咗,之後賣咗隻「殼」畀新殼主……

程更計:呢個咪係頭先講「殼」同「肉」分離嘅case。

戴孤劃:阿程,你咪叻唔切啦,高仁都未講完。

高 仁:Well……我聽過有一個case,係原大股東將「殼」同「肉」分離,從事建築業務嘅「肉」係賣咗畀另一個I3P(獨立第三方),但轉過頭呢個I3P又將原先建築業務呢舊「肉」重新包裝,再遞上去港交所申請上市。

程更計:嘩!果然係夠特別喎!

戴孤劃:梗係啦,五星級大酒店喎,梗係要有啲gimmick嘢嘅。

高 仁:如果唔係,你點會捨得畀咁多錢嚟飲呢餐喎。

本欄逢周一刊出

歡迎交流上市公司的財技個案及招數,請電郵至[email protected]

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads